Reprezentante Kondotór Bus husi Munisípiu Dili ba Baukau, Lospalos no Vikeké, Alcino António Ximenes, apela ba pasajeiru sira husi munisípiu tolu, bainhira halo viajen husi Dili ba Lospalos atu selu $10 ba kada kadeira, no diresaun Díli Baukau $6.

“Mina nia folin sa'e ami hakarak husu de'it ba Governu atu halo nusá para ita hotu nia kompriensaun para pasajeiru bele aumenta de'it ba Lospalos $8 sa'e ba $10, usi Baukau mós $4 aumenta ba $6 no Vikeke mós la'ós dehan ita obriga malu maibé tanba mina, tanba ne'e mak husu ita-nia kolaborasaun para ita la'o di'ak e labele fó impaktu filafali ba ami sira kondotór ne'e”, dehan Kondotór Alcino ba Jornalista sira iha Terminal Bekora, segunda (04/04).

Dadaun ne'e mina folin sa'e tanba ne'e mak provizoriamente sei paradu (mogok) hodi hein Ministeriu Transporte Komunikasaun rezolve hafoin halo fali viajen tuir ida-idak nia diresaun.

‘Tanba mina nia folin ne'e mak ami sente ladún di'ak tanba ne'e mak konvika kolega sira husi diresaun Baukau, Lospalos no Vikeké para sementara loron ida rua tenke ser ami mogok tiha”, haktuir nia.

Nune'e kondotór Diresaun Dili-Lospalos, Albino da Costa informa, nia hakarak azije nia direitu atu Ministériu sira rezolbe problema ida ne'ebé mak hasoru hanesan tarefa mina ne’ebé sa'e.

“Problema ne'e mak mai hasoru mak agora tarefa mina nian, ami-nia azijensia mak ne'e de'it, la'ós la halai ne'e la iha, ami mak azije ami-nia direitu, ami mai atu halo asaun ba estadu ne'e laiha tanba estadu ne'e iha mak hari’i”, dehan nia.

Bainhira Governu seidauk fó rezultadu kona-ba folin mina ne'ebé sa'e, mak kondotór sira sei halo karta ida hodi dirije ba Ministériu Kompetente atu rezolve situasaun kondotór sira hasoru.

‘Kuandu halo mogok mak laiha responde husi Governu, ami sei halo karta ida, husu ba laiha ema ida mak tau matan mai ami, ami sei tur hamutuk hodi halo reuniaun ida hodi halo surat atu hato'o ba Ministériu kompetente para atende lalais ami-nia situasaun ne'ebé ami iha”, afirma nia.

Alende ne'e Pasajeiru Rosita Guterres hatete, hanesan pasajeiru prontu selu tuir tsrfeta ne'ebé mak iha maibé tenke iha sikular husi Governu.

“Horseik ami husi Baukau mai Dili mai hakoi mate iha Manleuana ne'ebá agora ami atu fila mak bus la halai ne'e, sira la halai tanba kondotór sira dehan mina folin sa'e ne'e, ne'ebé sira dehan atu selu aumenta ba $6 ami prontu selu, mais la buat ida ami bele ba”, dehan nia.

Bainhiera mina nia folin sa'e mak kondotór sira dehan hasa'e no folin hanesan pasajeiru prontu selu tuir tarefa ne'ebé mak prepara, maibé tenke iha karta legalidade ruma.

Mina Gazoel, Gazolina ne'ebé mak folin antes ne'e iha kada litru ho folin $0.85 maibé derepente de'it sa'e ba $1.50 nune'e difikulta kondotór nia viajen tuir ida-idak nia diresaun.

Tanba osan ne'ebé mak hetan, sei ense de'it ba mina nune'e la hetan osan hodi selu, tanba ne'e mak kondotór sira lakohi hala’i, bainhira Governu rezolve kondutór sira-nia problema, hafoin halo sikulasaun. (*)