Diretór Servisu Protesaun Sivil no Jestaun Desastre Naturais Munisípiu Baukau, Nelson Nunes haktuir, iha loron 12 fulan-abril tinan-2021 (horseik) pur-volta tuku 02:00 parte loraik, akontese inséndiu iha área Abaguia, Aldeia Uligata, Suku Afaça, Postu Adminisitrativu Kelikai, Munísipiu Baukau, rejulta uma ida no dapur ahi han to'o mutuk.
Husi inséndiu refere, sasan uma la hetan salva, nune'e vítima na'in-8 kompostu husi Feto na'in-6 ho mane na'in-2 dadaun iha hela kondisaun triste.
"Oras ne'e dadaun ékipa husi protesaun sivil husi Munísipiu Baukau, komisaun jestaun dezastre preparadu atu apoiu emerjénsia ba vítima inséndiu ida ne'e iha tereñu," dehan Nelson iha kna'ar fatin, kuarta (13/04).
Apoiu emerjénsia ne'ebé atu apoiu mak hanesan fos saku-2, sardina dós-ida, suprami dós-ida, susuben kaixa-2, mina bimoli masa-2, biskuat, kafé, agua inklui family kicts kompostu husi sasan dapur.
Motivu husi inséndiu ne'e, seidauk hatene loloos, tanba ahi han husi uma laran, nune'e deskonfia sirkuitu husi eletrisidade.
"Laiha rezulta ema kanek, sira uma na'in sai tiha mak ahi han, tuir informasaun ne'ebé mak simu," nia hatete
Entertantu, ékipa Protesaun Sivil no Jestaun Desastre Naturais Munisípal, dadaun iha ona tereñu fatin akontesementu halo verifikasaun hodi submete ba nasionál. (*)
