Tuir informasaun ne’ebé www.tempotimor.com asesu husi p’ajina ofosiál Ministériu Obras Públika kinta (21/04) katak, ekipa tékniku sira ne’e maihusi Diresaun Jerál Administrasaun no Finansas (DJAF), Diresaun Jerál Obras Públikas (DJOP), Adhoc ne’ebé lidera husi Prezidente Autoridade Nasionál Água no Saneamentu Institutu Públiku (ANAS.IP), Domingos Pinto, inklui Organizasaun Naun Governamentál (ONG) Permakultura Timor-Leste (PERMATIL).

Tanba programa prezervasaun bee ne’e presiza envolvimentu husi ministériu ka instituisaun relevante hodi haree foho lolon sira hodi refloresta filafali ai tanba foho lolon haree bainhira bailoron mamuk hotu.

Orientasaun ne’e, Ministru Abel hato’o liuhusi enkontru iha salaun MOP, Kaikoli, Dili, ho partisipa husi Diretór Jerál Obras Públikas (DJOP), Rui Hernani, ho Diretór Nasionál no ekipa Adhoc, parte husi Diresaun Jerál Administrasaun no Finansas (DJAF), Prezidente ANAS.IP, Domingos Pinto, Diretór PERMATIL, Eugénio 'Ego' Lemos, inklui tékniku sira.

Antes ne'e Ministru Abel mós orienta ona Prezidente ANAS.IP, Domingos Pinto, responsável no organiza programa prezervasaun bee no koordenasaun ho Diresaun Jerál Administrasaun no Finansas (DJAF), Diresaun Jerál Obras Públikas (DJOP) ekipa Adhoc, inklui autoridade lokál sira iha área programa ne'e lokaliza ba hodi apoiu másimu ba redusaun rísku inundasaun. (*)