Tuir informasaun ne’ebé www.tempotimor.com asesu iha pájina Miniteriu Obras Públika katak, Ministru Obras Públikas (MOP), Abel Pires da Silva, akompaña husi Prezidente Autoridade Nasionál Água no Saneamentu Institutu Públiku (ANAS.IP), Domingos Pinto, Diretór Jerál Obras Públikas (DJOP), Rui Hernani, vizita debu barak ne'ebé joven sira ho apoiu husi Permakultura Timor-Leste (PERMATIL) ke'e iha área Natsuka.

Iha vizita ne'e simu direita husi Diretór PERMATIL, Eugénio 'Ego' Lemos, no Xefe Aldeia Sukalau, Aida de Araújo, ho komunidade no joven sira iha aldeia Sukalau.

Iha intervensaun Ministru Obras Públikas (MOP), Abel Pires da Silva, apresia vontade joven no komunidade liliu apoiu husi PERMATIL nian hodi ke'e debu iha foho leten, retein udan-been labele hamosu inundasaun iha kapitál Dili.

Tanba diskusaun inísiu ne’e simples, tanba-sa mak tinan-tinan MOP lakon osan barak halo rekoperasaun iha kraik, mota naksobu, mota sobu ponte, sobu estrada, sobu ema-nia uma, lakon osan barak atu hadi’a, entaun hanoin katak kauza ne’e iha leten tanba volume bee boot ho velosidade maka’as tuun ba ne’e ba loos de’it, laiha esforsu ruma ke redús,

Nune’e mak hanoin tenke halo buat ruma atu oinsá komesa halo prevensaun ne’e, infelizmente Ministériu foin hanoin mais Ego Lemos, ho xefe aldeia iha ne’e halo tiha ona. Tanba ne’e mak lori Ministériu haree atu replika halo tuir fali sira-nia esperiénsia ne’e la’ós de’it iha fatin ida-ne’e maibé iha fatin foho ne’ebé hale’u kapitál Dili

“Ohin ha’u kontente sira halo ida-ne’e (debu) barak loos ne’e hodi liman de’it ho apoiu husi joven sira ne’e, ida-ne’e mak eroi ida erra ukun rasik-an mak sira-ne’e. Agora MOP nia papél mak saida?. Apoiu totalmente, agora daudauk ne’e ita-nia ekipamentu barak mak sei haree mota iha fatin barak mais tama ona tempu bailoron laiha ona razaun”, hatete Ministru Abel ba jornalista sira hafoin vizita debu sira iha aldeia Sukalau, Suku Dare.

Maibé Ministériu sei apoiu atu esforsu ida manuál ke’e oituan-oituan ne’e ke’e luan-tan, halo barak liután, para benefísiu ne’ebé mak durante ne’e Ego Lemos no xefe aldeia hetete dehan agora balada fuik mai barak, tempu udan mota laiha ona sobu estrada, tempu bai-loron bee-matan sira komesa barak ona, rezolve problema bee no rezolve problema barak ne’ebé durante ne’e komunidade hasoru, ida-ne’e mak hakarak halo barak liután.

"Agora benefísiu indireita ba MOP, ne’e mak ida ohin ne’e, reduz bee atu ba sobu iha kraik ne’e (kapitál Dili), entaun ikus mai ita sei poupa osan barak husi rekoperasaun barak ne’ebé mak la presiza akontese tan kuandu esforsu sira ne’e hala’o husi povu tomak iha Dili laran, ida-ne’e mak ita hakarak halo e ha’u agradese ha’u-nia apoiu, ami-nia esforsu sei kama’an kuandu ita la’o hamutuk ho ita-nia parseiru sira ne’ebé mak durante ne’e halo tiha ona, la’ós de’it Dili maibé ba munisípiu tomak”, hatete nia.

Ba tinan 2022 foku iha Dili tanba populasaun barak, depois iha kapitál mais tama tinan 2022 ba foho, mota Dilor nian leten, mota Welolo, mota Loes, sei halo hanesan loos de’it ho ida ne’ebé halo ona hanesan esperiénsia sira bele ba halo treinamentu, ne’ebé halo hela, tanba parseiru sira mak ajuda malu oinsá bele halo sira-nia servisu ne’e barak liután para prevensaun ne’e bele la’o di’ak.

Ministériu Obras Públikas kria ona ekipa tékniku halo preparasaun ba prezervasaun bee iha foho lolon, inklui sei kria Diresaun Jerál ida ba prevensaun hodi redús rísku inundasaun iha kapitál Dili kada tinan ikus ne'e sempre akontese.

“Vizita ida-ne’e parte ida husi esforsu atu halo survey, ita-nia Prezidente Autoridade Nasionál Água no Saneamentu iha ne’e, ne’e Engineiru, Doutoramentu iha área bee nian sira hatene, Sr. DG, no enjineiru barak mak iha ne’e, sira hatene, sira halo survey, mai haree lai esforsu ne’ebé mak la’o ona depois sira survey iha fatin hothotu, sira halo dezeñu tuur hamutuk ita haree dezeñu, dezeñu iha ona mak depois ita haree”, dehan nia.

Ho ida ne’e atu rekruta joven hira, joven hotu ne’ebé hela besik área ne’e, sei rekruta, sira ne’ebé mak hakarak servisu atu apoiu esforsu ida-ne’e, la’ós de’it proteze sira-nia hela fatin maibé proteze mós komunidade sira ne’ebé hela iha Dili, tanba ministériu iha orsamentu ba ida-ne’e, sei fó prioridade númeru 1 depois tempu udan remata.

Ba planu ne’e hahú ba oin tanba MOP atu kria diresaun foun ida haree de’it esforsu prevensaun, diresaun ne’e sei tau-matan ba ida-ne’e, la’ós de’it iha Dili maibé ba teritóriu laran tomak, aproveira servisu ne’ebé PERMATIL halo ho autoridade lokál halo ona replika, halo luan liután esforsu ida-ne’e ba Timor laran tomak.

Daudauk ne'e, MOP halo ezersísiu iha ministériu halibur osan aloka ba programa prezervasaun bee ne'ebé sei envolve husi parte hotu, inklui autoridade lokál liuliu joven sira iha suku.

Diretór PERMATIL, Ego Lemos hatete, PERMATIL ho komunidade hahú ke'e debu iha fatin refere iha tinan 2019, halo mós akampamentu, mobiliza joven husi munisípiu 13 halo treinamentu iha fatin refere, ba programa retein udan-been, hafoin joven sira halo akampamentu no partisipa iha formasaun, filafali ba ida-idak nia munisípiu implementa programa ida-ne'e.

Programa retensaun udan-been ne'e PERMATIL halo ona iha fatin barak no iha duni benefísiu ba komunidade hela besik tanba antes ne'e rai mamuk maibé agora rai-matak.

Xefe Aldeia Sukalau, Aida de Araújo, reforsa katak dezde tinan 2019 PERMATIL ajuda komunidade ke'e debu iha fatin refere, tempu bailoron rai matak hela de'it tanba bee iha rai-okos iha, balada fuik hahú barak, iha oportunidade ba komunidade haki'ak animál, halo produsaun ba ortikultura.

Bainhira ke'e tiha debu iha fatin refere, PERMATIL husu atu komunidade labele taa ai no oho balada fuik sira, tanba ne'e, iha tinan rua nia-laran ai-horis matak hela de'it no balada fuik barak nafatin iha tempu udan no bailoron.

Iha oportunidade ne'e Diretór PERMATIL no xefe aldeia hamutuk ho komunidade agradese ba vizita Ministru Abel Pires nian no espera katak ba oin sei apoiu di'ak liután komunidade hodi ke'e debu barak liután hodi proteze ai-horis no balada sira iha área refere. (*)