Reprezentate formadu, ne’ebé husu labele temi naran, hatete, hahú husi rejistu naran osan ID.Card no osan orientasaun nian hamutuk US$17, aumenta tán osan kada fulan selu hamutuk US$30 nune'e montante lolos hamutuk US$47, tanba kada fulan selu US$5, ba durasaun formasaun fulan-6 nian.

"Ami la dun satisfas, entaun ami hato'o keixa ba Diretór SEFOPE Baukau nian, aktus sira halo dadauk ne'e, konsidera kasar liu karik, korupsaun," dehan nia iha salaun SEFOPE Baukau, tersa (26/04).

Hatan ba kestaun ne'e, Diretór SEFOPE Baukau, Romualdo António de Souza, hatete, formasaun lian koréa gratuita, maibé kadidatu remata ona formasaun duranre fulan-6, hafoin selu atu kompleta dokumentu.

Maibé, iha Munísipiu Baukau, sentru formasaun ne'ebé atu simu rejistu formadu foun sira, presiza osan US$3, tanba wainhira formasaun hahú sei presiza bee no kadernu no lapizeira.

"Kandidatu sira ohin ne'e, mai husi vizaun foinsa'e, hotu-hotu rejistu husi vizaun foinsa'e, ne'ebé númeru ohin 47 (montante osan) ne'e ba fali promete ba joven sira atu halo ID, farda buat sira ne'e, ha'u tenta aban ha'u hato'o," nia hatete

Loron 27 fulan-abríl tinan-2022 SEFOPE Baukau sei halo relatóriu hodi relata ba nasionál, tanba orientasaun klaru ona formasaun lian koréa gratuita.

Nune'e, kordenadós sentru formasaun UVC Baukau, Silvino dos Reis Freitas, hatete, osan ba rejistu naran ne'ebé simu husi formadu sira, razaun atu sosa bee, selu prepagu inklui roupa (farda formasaun), tanba hetan orientasaun husi parte SEFOPE atu utiliza edifísiu sentru formasaun YVC Baukau ba formasaun lian koréa nian.

Maibé, to'o ikus laiha informasaun deside hapara sentru formasaun YVC Baukau ba lian koréa, sai fatin formasaun ba lian koréa nian.

"Ami la'os husu osan taka matan nian, tuir ami nia ezijensia fali, atu hanehan fali ita nia foinsa'e ami laiha intensaun hanesan ne'e," nia argumenta

Tanba ne'e, sei devolve fali formadu sira nia osan, tuir montante ne'ebé antes ne'e iha. (*)