Diretór servisu Ministériu Obrás Públikas (MOP) Baukau, Pedro Alexandre Guterres Perreira, hatete, projeitu pakote-7 ba Munísipiu Baukau orsamentu husi tinan-2021, maibé tarde iha prosesu aprovizionamentu, nune'e iha tinan-2022 fulan-abríl ne'e, kompañia lokál hamutuk-7 asina ona kontratu hodi halo servisu.

"Ita nia planu, enkontru ida ne'e, hotu ita hahú kedan, servisu hahú iha semana oin mai, komesa haruka sira para mobiliza sira nia ékipamentu, matérial, organiza, kordena traballadores para sira komesa servisu ona, tanba kontratu asina tiha ona," dehan nia iha salaun apuramentu Baukau, kuarta (11/05).

Projeitu reabilitasaun estrada rurál iha Postu Administrativu Kelikai, husi Suku Afaça, Gurusa to’o Suku Uai-tame hamutuk kilometru-12 fahe ba pakote-4 kada kompañia ida, sei hetan 2 kilometru.

Enkuatu ba Postu Venilale, husi Suku Uai-oli ba Venilale vila hamutuk kilometru-8.6 fahe ba pakote-3 kada kompañia sei hetan purvolta kilometru-3.

"Iha 20,6 kilometru, ho orsamentu 2.5 millões, orsamentu ne'e, mai husi kofre estadu iha item fundu infraestrutura nian," nia informa

Nune’e husu autoridade atu kopéra ho kompañia sira iha prosesu reabilitasaun estrada atu garante kualidade hodi bele fó benefisiu ba povu.

Xefe Suku Afaça, Joaquim Fernandes Ximenes, sente kontente, tanba estrada rurál ne'ebé husi Suku Afaça to'o Suku Uaitame dadaun kondisaun grave difikulta populasaun atu transposta sira nia produtu lokál ba merkadu, maibé iha tinan-2022 Governu sei fasilita liuhusi projeitu reabilitasaun tuir kapasidade orsamentu.

Estarada rural husi Suku Afaça ba to'o Gurusa, kompañia lokál bele halo konstrusaun, maibé parte Suku Uaitame nian mak susar atu kompañia lokál sira halo reabilitasaun, tanba akur mota.

"Ha'u duvida tebes, tanba ita nia emprezáriu lokál mak tama iha ne'eba bazeia ba ékipamentu bele ga la'e, tanba ha'u hanoin estrada husi Gurusa ba Uaitame ne'e ha'u hanoin emprezáriu internasionál mak bele," nia argumenta

Diretóra kompañia Lialura Unipesoal Lda, Gabriel da Consienção Boavida, hatete, Lialura Unipesoal Lda sei servisu iha estrada rurál diresaun Kelikai  Uaitame ho kilometru-3 ho orsamentu US$ 535.829.

"Nu’udar kompañia garante katak servisu di’ak, kompañia sei la la'o mesak, maibé sei hamutuk ho autoridade Suku no populasaun hela iha área ne'eba hodi hamutuk tau matan ba projeitu ne'e sai kualidade ne'ebé di'ak," nia argumenta

Entretantu, projeitu ba reabilitasaun estrada rurál ho durasaun tinan-ida. (*)