“Husu para hadi’ak di’ak liután, tenke hatama dadus, see hanesan ne’e de’it ita gasta osan barak mak dadus la kompletu entrega mai ita de’it, depois ita gasta tan osan millaun ba millaun hodi hadi’ak filafali ne’e labele, tente kompleta tiha mak entrega ba ita”, dehan Ministru bainhira akompaña aprezentasaun husi Estrada Rurál ba Dezenvolvimentu (ERD) kona-ba sistema IRMIS iha salaun enkontru Gabinete MOP, Kaikoli, Dili, tersa (24/05).

Sistema IRMIS sei utiliza liuhusi Software ka aplikasaun ida atu publika dadus kona-ba estrada nasionál, urbana, munisipál no rurál iha territóriu Timor laran tomak, kompleta ho mapamentu no lokalizasaun, progresu servisu ba kada projetu infraestrutura nian.

Bainhira utiliza sistema ne’e, husu ba Catalpa hadi’ak no kompleta dadus sira inklui fó formasaun ba funsionáriu sira iha MOP no munisípiu sira oinsá utiliza sistema ne’e, imput ka hatama dadus projetu estrada nian.

Tanba sistema IRMIS, hanesan sistema prinsipál atu fasilita planu integradu ba orsamentu, kontratu no jestaun bainhira hala’o projetu. Sistema ne’e ba kriasaun baze dadus ba estrada hotu iha territóriu tomak, tanba involve programasaun, jestaun, planifikasaun, ezekusaun no manutensaun.

Fundus ba kriasaun sistema ne’e husi Governu Austrália liuhusi Department Foreign Affairs and Trade (DFAT) liliu programa apoiu Estrada Rurál ba Dezenvolvimentu (ERD) nian.

Iha aprezentasaun ne’e partisipa husi parte ERD no ILO (International Labour Organization), inklui tékniku sira husi gabinete MOP. (*)