Tuir informasaun ne’ebé www.tempotimor.com asesu iha pájina MOP, sesta (10/06) katak, prosesu konkursu públiku ba projetu rua ne’e daudauk la’o hela iha Komisaun Nasionál Aprovizionamentu (CNA) to’o inísiu fulan-jullu nian konkursu públiku ne’e taka ona, sei halo prosesu verifikasaun ba dokumentu sira husi kompaña interesadu sira, sei han tempu fulan rua ka tolu bele hetan ona rezultadu ba konstrusaun.
“Tender ba projetu estrada Laga-Baguia loke semana rua ona ne’ebé oituan tan iha inísiu Jullu ne’e taka ona para sira bele prosesa ona kompña hira mak hatama dokumentus depois ita haree, ha’u hanoin prosesu verifikasaun, avaliasaun sira ne’e han tempu oituan to’o fulan rua ou tolu, ita hetan ona, depois ida-ne’e ita selebra ona kontratu, [depois de hetan visto preve husi Câmara de Contas], kontinua halo ona konstrusaun, ne’ebé antes udan ne’e bele ona halo konstrusaun. Agora tender ona ne’e garante 100%”, Ministru Abel informa ba jornalista sira iha Palásiu Governu, kuarta (08/06).
Tanba CNA loke ona konkursu públiku ba projetu estrada munisipál Uaiaka-Kelikai-Ossu iha loron 24 fulan-maiu no ba Laga-Baguia iha loron 27 fulan-maiu tinan ida-ne’e.
Hafoin hetan aprovasaun iha Konsellu Administrasaun Fundu Infraestrutura (KAFI) no kontinua hetan autorizasaun husi Konsellu Ministru hodi loke prosesu tenderizasaun internasionalmente ba projetu rua ne’e. (*)