Iha loron kinta (07/07), Ekipa SEKOOP hala’o vizita ba Kooperativa Kréditu Uniaun (CU) Tasai Sele hodi rona no akompaña direta situasaun no kondisaun ne’ebé mak durante ne’e kooperativa rasik hasoru.

Dirijente Kooperativa Kréditu Uniaun (CU) Tasai Sel, Simão Quelo informa, iha problema boot ne’ebé mak enfrenta mak menus akompaña husi SEKOOP CU Tasai Sele deside taka, no fahe osan filafali ba kada membru ida-idak.

“Komesa iha tinan kotuk fulan-maiu to'o tinan ida fulan-maiu ne’e ami hein kooperativa husi SEKOOP la mai akompaña ami, entaun ami fahe tiha ami-nia osan ona, foin dadauk fulan-maiu ne’e”, dehan nia bainhira hato'o lamentasaun ba SEKOOP iha Sub-Rejiaun Oesilu, Suku Usitakae Aldeia Buki, kinta (07/07).

Antes ne’e hetan ona formasaun husi treinadór sira maibé lakonsege akompaña durante tinan ida nia laran sira deside fahe malu.

“Ami membru iha 22 ami foin dadus  fahe tiha ami-nia osan kada ema ida hetan $95.00”, haktuir nia.

Totál osan ne’ebé mak CU Tasai Sele fahe ba membru sira aman hamutuk osan rihunrua-resin (2.000 resin).

Maibé nia parte sei prontu hodi reativa filafali grupu ka kooperativa CU Tasai Sele bainhira SEKOOP akompaña fali no fasilita formasaun ba dirijente kooperativa sira.

Sekretáriu Estadu Kooperativa (SEKOOP), Elizário Ferreira, husu ba Kooperativa CU Tasai Sele objetivu atividade rona preokupasaun no dezafiu sira ne’ebé mak durante ne’e kooperativa sira iha Oekussi ne'e rasik.

“Objetivu ha’u-nia vizita mai Oekussi, atu ko’alia kona-ba sesta bázika ne’ebé Oekussi atu hetan, ne’ebé ami mós akompaña mós hatene mós ita-boot sira-nia kondisaun”, dehan nia.

Kooperativa CU Tasai Sele durante ne’e hala'o atividade rai no Empresta osan alende ne’e mós kuda batar no fore, hodi lori ba merkadu hodi hetan osan no rai ba Kooperativa hodi fasilita oan sira ba eskola sira.

Momentu CU Tasai Sele durante sei eziste la'o ho di’ak konsege fa'an batar no fore rai to'o tonelada rua to'o liman tonelada. (*)