Tuir informasaun ne’ebé www.tempotimor.com, asesu iha pájina MOP, kuarta (27/07) katak, Ministru Obras Públikas, Abel Pires iha intervensaun hatete, objetivu hari’i kooperativa iha ministériu ne’e iha tolu mak oinsá funsionáriu sira bele asesu ba nesesidade báziku sira, asesu ba kréditu no ikus liu mak abitasaun ba funsionáriu sira.

“Ha’u agradese ba Diretór Jerál ne’ebé organiza ona treinamentu importante ida-ne’e, ha’u la’ós ema kooperativa tanba ne’e ha’u sei la ko’alia barak hanesan ita-nia Sekretáriu Estadu, formadór sira iha ne’e ita mai para aprende husi sira, maibé ha’u so fiar de’it ba forsa koletiva, tanba ne’e mak lori ita mai ohin loron ne’e”, dehan Ministru Obras Públikas Abel iha abertura ba treinamentu báziku no estabelesimentu kooperativa iha salaun enkontru MOP, Kaikoli, Dili.

Maibé fiar katak ho kontribuisaun husi hothotu sei halo buat tolu iha ministériu ne’e ba, priméiru mak asesu ba nesesidade báziku sira, ho kooperativa ne’e bele garante, segundu asesu ba kréditu no ida seluk mak abitasaun, imajina iha 1.700 pesoál funsionáriu, la’ós hothotu maibé kuaze fó kontribuisaun $25.00 kada fulan ema ida, tinan ida bele salva ka rai hela liu $500.000.00, purezemplu rai to’o tinan rua, iha millaun $1 resin ona, imajina situasaun ne’e agora 2022, rai to’o 2024 bele ona halo aprosimasaun ba kompaña boot iha Indonézia, Malázia ka Singapura atu halo uma ba funsionáriu ministériu nian.

Tanba ho forsa koletiva ne’e sei iha transforma boot tebes ba funsináriu sira-nia moris mais difísil atu hahú tanba ema hanoin katak sei konvense ida-rua de’it mós difísil oinsá mak ba ema rihun-ida, maibé labele hein, tenke halo, tau iha prátika.

“Agora komu ha’u mós ladún hatene, ita-boot sira mós ladún komprende ne’e mak ohin loron ita bolu husi SEKOOP”, afirma nia.

Nune’e agradese ba disponibilidade Sekretáriu Estadu Kooperativa nian hodi fahe esperiénsia kona-ba Kréditu Uniaun ne’ebé motiva tebes funsionáriu sira MOP nian, tanba ne’e, husu ba dirijente no funsionáriu sira ne’ebé partisipa iha treinamentu ne’e atu utiliza tempu ho di’ak hodi aprende di’ak liután kona-ba benefísiu husi kooperativa nian.

Sekretáriu Estadu Kooperativa (SEKOOP), Elizário Ferreira, mós fahe esperiénsia kona-ba kooperativa kréditu ne’ebé iha vantajen boot tebes ba membru sira no esplika katak Kréditu Uniaun sei eduka membru sira oinsá uza osan no buka osan.

“Iha konseiru kréditu ne’e hanesan ne’e, kuandu ema ida hahú impréstimu nia mak ki’ak, nia hakraik-an nia husu tebes ba ita atu fó osan ba nia, maibé kuandu nia hetan tiha impréstimu, nia hetan tiha osan ita mak sai fali ki’ak, tanba loroloron ita tenke hakraik-an husu oinsá mak nia bele devolve osan ne’e, entaun konséitu mak ida-ne’e, tanba ne’e ma kami sempre foku ba formasaun ne’e sai hanesan baze atu eduka ema ne’ebé servidór kréditu uniaun ne’e bele sai ema ne’ebé mak bele eduka membru sira atu hatene uza ho osan ho di’ak, hatene oinsá hatene uza osan no hatene buka osan”, dehan Elizário.

Ba osan saláriu dala-ruma fulan ida nian gasta la to’o fulan, entaun kréditu uniaun mosu bainhira loron 15 nia-laran saláriu hotu bele impresta iha kooperativa.

Kréditu Uniaun ne’ebé eziste ona iha Timor-Leste to’o iha loron 31 fulan-Jullu tinan 2022 hamutuk 127 ho membru hamutuk 27.078 ne’ebé adere ba kréditu no akomoda ona millaun $22 dollar amerikanu, tanba ne’e agradese ba Ministru Obras Públika ne’ebé iha inisiativa di’ak hodi kria kooperativa kréditu iha ministériu hodi fasilita funsionáriu sira.

Diretór Jerál Administrasaun no Finansas (DJAF), Januário P. Barbosa, hatete iha fulan ida ba kotuk, sira tuur hamutuk ho Ministru Obras Públikas fó ideia ida katak, tanba saida mak funsionáriu ne’ebé barak tebes la halo kooperativa ida.

“Entaun ho inisiativa ida-ne’e ha’u hanesan Diretór Jerál Administrasaun no Finansas ha’u ba kedas SEKOOP koordena ho kolega sira auditória iha SEKOOP no mai hamutuk iha ne’e fahe informasaun, ohin ita bele realiza hamutuk formasaun iha MOP”, esplika nia.

Kona-ba númeru funsionáriu ne’ebé daudauk ne’e iha Ministériu Obras Públikas hamutuk 1.700 no partisipantes iha formasaun faxe primeiru ne’e reprezentante husi diresaun sira, no bainhira rezistu tiha sai membru kooperativa sei realiza tan formasaun kona-ba kontabilidade no selun tan ne’ebé bele fasilita kooperasaun bele la’o ho di’ak.

Treinamentu ne’e sei hala’o durante loron 5 hahú husi loron 26 fulan-Jullu to’o 1 fulan-Agostu 2022, no partisipa husi dirijente sira.

Iha serimónia abertura ba treinamentu ne’e partisipa mós husi formadór sira husi SEKOOP no formandu sira husi MOP rasik. (*)