Tuir informasaun ne’ebé www.tempotimor.com asesu iha pájina AIFAESA, tersa (09/08) katak, ekipa husi seksaun turístika, AIFAESA realiza inspesaun ba restaurante, Salaun, ajénsia viajen no estabelesimentu sira ne'ebé komersializa bebidas no alimentár iha área Kolmera.

Husi inspesaun ne'e ekipa kontrolu Restaurante hodi verifika kondisaun dapur, produtu ai-hán sira ne'ebé konserva iha estabelesimentu ne'e, enkuantu ba salon no ajénsia viajen ekipa verifika lisensa ba atividade komersial.

Ekipa operasaun ne'ebé lidera husi Xefe Brigada Turístika, Damião Cau Metan, Prende Produtu liu prazu iha estabelesimentu Allalong, hanesan Cumi Seasoning plastiku 210, kuweike matak plastiku 20, kuweike azul plastiku 18, kuweike coklat plastiku 18, kuweike orange plastikuu 20 no sambal merah hamutuk 803.

Ba produtu hirak ne'ebé ekipa prende husi estabelesimentu refere, daudaun ne'e asegura ona iha armajen AIFAESA Matadouro.

Entretantu Inspetór AIFAESA ne’ebé kompostu husi DO no DMP, halo inspesaun ba estabelesimentu sira ne’ebé lokaliza iha área Manleuana, Postu Administrativu Dom Aleixo.

Iha atividade ne’e, ekipa Operasaun deteta estabelesimentu xinéz ida (1) ne'ebé komersializa produtu liu prazu hanesan, “FROZEN GREEN PEAS”.

Tanba ne’e, inspetór responsável sei foti prosesu tuir infrasaun ne’ebé komete husi na’in ba estabelesimentu refere.

Iha oportunidade ne’e, ekipa konsege inspesiona estabelesimentu hamutuk lima (5), ne'ebé rezulta konvoka mós na’in ba estabelesimentu ida (1), tanba la aprezenta autorizasaun komersiál. (*)