Ho mehi ne’ebé iha joven mekániku iha konsege lori nia hakbesik-an ba Prezidente Repúblika, José Ramos Horta hodi aprezenta oinsá atubele kria no objetivu atu hari’i fábrika refere iha futuru.

“Ohin ha'u aprezenta ne'e, ba oin ne'e atu hamenus alumíniu ita labele exporta ba rai-liur, ita-bele halo ita-nia industria ki’ikoan ida-ne'e hanesan sana, tasu, motorizada nia koplin, motorizasa nia travaun, ita bele produz iha ita-nia rai”, hatete nia hafoin halo aprezentasaun planu hari’i fábrika ne'e ba Prezidente Repúblika, José Ramos Horta iha Palásiu Prezidensial Bairo Pite, kuarta (09/08).

Ba inisiativa atu hari’i industria iha rai laran ne'e tanba bele halo kompetisaun ho materiál sira husi nasaun seluk, la'ós dehan fasil maibé  atu produz ida-ne'e sei presiza halo públikasaun iha jornál atu estudante universidade hothotu bele le, nomós ema bele no tetu persentajen produtu ne'e di'ak ka la'e.

“Se wainhira ita-nia produtu ne'e di'ak ona, entaun bele halo komparasaun ho nasaun sira seluseluk, ema bele hili ita-nia produtu iha ita-nia rai, ita-nia indústria ne'e di'ak no ita-nia materiál ne'ebe ita uza ne'e di'ak”, afirma nia.

Ezemplu ki'ik oan ida mak kafé, tanba kafé ne'e dala barak ema-nia nasaun sira iha hotu, hanesa Brazil, Indonézia nomós Áfrika ne'e kafé iha hotu.

Bainbira ema hakarak dehan hili Timor, entaun Timor nia produtu ne'e dala-barak Japaun ho Alemaña sira mak peskiza barak liu, no la'ós timoroan sira mak peskiza, nune'e Timor-Leste seidauk bele iha dadus kona-ba hira mak lanu ema, no nia sabor oinsá, nomós persentajen ne'e hira.

“Ne'e ita seidauk hatene loloos, ita atu uza saída mak tetu, ita atu uza saída mak uzi, ita seidauk hatene, ida-ne'e mak ha'u aprezenta ba Prezidente Repúblika”, esplika nia.

Tanba ne'e, hanoin kona-ba hari’i fábrika ida-ne'e di'ak tanba iha Timor ne'e lata no serveza ne'e barak, inklui karbon no agromiu mós iha, no buat hothotu ne'ebé atu halo produsaun ne'e iha, maibé Timor nia kapasidade kona-ba siénsia mak sei mínimu hela.

“Entaun ho ida-ne'e ha'u aprezenta na'in Prezidente Repúblika, karik ida-ne'e hanesan aprezentasaun de'it, ba oin ita iha, loke ona buat ne'e karik. Ba oin ita halo mak Indústria penggecoran, cor, motorizada nia koplin, ho travaun sira-ne'e e ida-ne'e karik ba oin  ita-nia produtu ne'e ita tenke halo públikasaun no bele halo komparasaun ho nasaun sira seluseluk, oinsá materiál Timor ninian di'ak ka la'e”, afirma nia.

Ba inisiativa ida-ne'e rasik Jornál Internasionál ba Área Mechanical Engineering ne'e rasik aprezenta ona ba Prezidente Repúblika, José Ramos Horta. (*)