Tuir informasaun ne’ebé www.tempotimor.com asesu iha pájina ofisial EDTL, E.P, Prezidente Ezekutivu EDTL, E.P, Paulo da Silva, hatete, iha Munisípiu Vikeke populasaun sira husi Suku seluk asesu hotu ona eletrisidade, maibé falta populasaun husi Suku Nahreka de'it mak seidauk.

"Iha Munisípiu Vikeke falta Suku Nahareka de’it, maibé espera iha fulan-fevereiru EDTL sei mai halakan ahi, nune'e Suku iha Munisípiu Vikeke asesu hotu ona eletrisidade", dehan nia iha Suku Liaruka, sesta (13/01).

Partilla mós kna’ar EDTL nian hafoin transforma husi diresaun ba EP simu kedas orientasaun husi Governu ne’ebé atu konklui projetu eletrifikasaun iha Timor laran, kobre ba suku 59 ne'ebé seidauk asesu eletrisidade.

EDTL dadadaun fahe servisu ba faze haat, hanesan, pakote 34 kobre Suku 23, pakote 44 kobre ba  Suku 17, pakote 36 kobre Suku 23, inklui mós ba Suku 3 ne’ebé EDTL foin promove mak, iha Suku Fatukalu, Munisìpiu Manufahi, Suku Nanu’u, Munisìpiu Kovalima no Fatumakerek Munisípio Manatutu, maibé maioria parte konklui ona.

Enkuantu, Aldeia sira ne’ebé seidauk assesu eletrisidade, EDTL iha programa projetu komunitáriu, ne’ebè EDTL sei servisu hamutuk ho komunidade hodi aselera instalasaun eletrisidade.

Aldeia no área remotas ne'ebé seidauk asesu eletrisidade, EDTL, E.P husu autoridade sira atu submete proposta, nune'e EDTL, E.P hatama ba planu hodi distribui panel solar ba sira.

Enkuantu, hahú fulan-janeiru tinan-2023, Governu liuhusi EDTL, E.P, konsege halakan eletrisidade iha Suku Liaruka Ossu, inklui Aldeia Laen-Tolun no Webot inkliu mós Suai Loro Munisípiu Kovalima.

Entretantu, to’o iha fulan-dezembru ikus tinan 2022, EDTL, E.P ofisialmente halakan eletrisidade ba uma-kain rihun 4.322, iha aldeia 66 ho distásia instalasaun media tensaun 139.12 kilómetrus sirkuitu, baixa tensaun hamutuk 180 kilómetrus sirkuitu no poste transformadór ne’ebé instaladu hamutuk 30. (*)