Maibé, tuir asina kontratu, durasaun servisu hahú iha loron 12 fulan-setembru tinan-2017, to'o loron-12 fulan-setembru tinan-2018 ho orsamentu tokon US$4-resin, maibé to’o agora sidauk remata.
"Estrada ne'e uluk Sr. Ministru Gastão de Sousa nia tempu, prosesu ne'e bolu ajudikasaun direita, entaun kompaña mak hatama nia proposta, depois halo verifikasaun, sira haree tereñu loos hotu ona, entaun sira asina kontratu", dehan Diretór Servisu Diresaun Ministéiru Obras Públiku (MOP) Baukau, Pedro Alexandre Guterres Perreira, iha kna'ar fatin, Kuarta (18/01).
Estrada ne’e husi Fatulia ba to'o Uaimori, pur-volta 27 kilo-metru, ne'ebé reabilita husi kompaña lokál Ruvic Construction Unipesoal. Lda, maibé na'in ba kompaña halo mudansa servisu iha tereñu fahe ba pakóte-4, nune'e pakóte-3 seluk responsabiliza husi ekipa MOP Vikeke.
Maibé, pakóte dahuluk iha Suku Fatulia, Venilale, ho kilo-metru 10.3, na'in ba kompaña hamosu ideia, hakarak promóve matérial konstrusaun husi nasaun Malazia ho naran Proveis, ne'ebé bele utiliza ba reabilita estrada atu labele hamosu rai-rahun iha tempu reabilita, maibé lakonsege, tanba na'in ba ekipamentu Proveis iha Malazia bankrota.
"Ida ne'e mak momentu sira konkorda ho Ministru Sr. Gastão atu promove iha ne'e, to'o ikus Proveis ne'e mós lakon tiha, entaun atu utiliza fali áspal, atu halo alterasaun to'o agora la jadi, to'o dezembru 2022 ne'e, 30.10 pursentu de'it", nia informa
Nune’e, durante Diresaun MOP kauze extende de'it kontratu husi kompaña, objetivu atu kontinua servisu ou la'e, maibé to'o ohin loron nafatin de'it la halo servisu.
Husu Ministéru relevante, atu foti dezisaun hasoru kompaña refere, tanba liuhusi enkontru nivél nasionál Servisu MOP Baukau hato'o ona preukupasaun hotu ba Ministéru atu fó solusaun, tanba kompaña la hatudu progresu di'ak.
"Ikus liu prolonga mak ne'e, 30 dezembru 2022, atu ajuda nia servisu, mais to'o fim laiha rezultadu", nia afirma.
Enkuantu, husi progresu servisu ho pursentu 30-resin, kompaña refere foti ona osan pursentu 25 husi Governu ho montante milaun-1 resin, tanba kompaña konsege konstrui bee dalan (salurang), hada drainajen inklui ateru estrada, no hetan verifika husi Ajénsia Dezenvolvimentu Nasionál, Institutu Públiku (ADN, I.P). (*)
