Tuir informasaun ne’ebé www.tempotimor.com, asesu iha pájina AIFAESA, kinta (31/08/2023) katak, AIFAESA, I.P informa ba públiku liliu ba konsumedór no operadór ekonómika hotu katak, produtu fós Manu-Vitoria ne'ebé AIFAESA suspende provizóriu nia sirkulasaun iha merkadu liu hosi konferénsia imprensa ne'ebé hala'o iha loron 7 fulan-Jullu tinan 2023 ne'e, ho razaun tamba produtu refere deskonfia iha kualidade ne'ebé la di'ak ka estragadu, ne'ebé AIFAESA husu hodi hein rezultadu teste laboratóriu.

Liuhusi orientasaun ho orden Inspetór Jerál nian ba ekipa téknika sira rekolla amostra iha loza distributór Perissos Vitoria, Lda, nomós loza retalista sira.

Alende ne'e, ekipa téknika mós ho ordem servisu husi Inspetór Jerál nian ne'ebé orienta ekipa téknika sira transporta kedas amostra fós ho marka Manu-Vitoria ba BPOM-Kupang, iha loron (16/07/2023), no entrega amostra refere iha loron (17/07/2023), ne’ebé ekipa téknika halo akompañamentu amostra ba teste laboratóriu refere.

Husi teste labortóriu ne'ebé hala'o iha BPOM-Kupang-Indonézia refere, rezultadu teste hatudu katak, jeralmente fós ho marka Manu-Vitoria iha ‘kondisaun di'ak’ bazeia ba parametru ne'ebé mak rekomenda tuir padraun SNI nomós Codex Alimentarius nian.

Enkuantu relasiona ho kondisaun fós ne'ebé kór kinur ka malahuk no indikasaun ba tein tasak iha iis ne'e, tamba kategória ba fós Parboiled ka Beras Pratanakno produtu refere la afeita ba moras ruma ba ema nia saúde no bele konsumu.

Hosi rezultadu teste laboratóriu BPOM-Kupang-Indonézia no análiza téknika AIFAESA nian ne'ebé iha maka AIFAESA hakarak informa ba públiku katak, Fós ho marka Manu-Vitoria laiha indikasaun ba kontaminasaun ho substánsia fizika no kimika ne’ebé prejudika ba ema nia saúde.

Nune’e operadór Ekonómika sira hotu iha teritóriu Timor-laran tomak, Provizoriamente ne'ebé AIFAESA suspende sirkulasaun produtu fós ho marka Manu-Vitoria refere, ho abertamente AIFAESA autoriza hikas sirkulasaun ka komersializasaun produtu Fós ho marka Manu-Vitoria ba Públiku.

Rekomenda ba importadór Fós sira hotu atubele halo klarifikasaun ba públiku ligadu ho kualidade fós antes fa’an wainhira iha mudansa ruma. Ba Konsumedór sira hotu iha Teritóriu Timor-Laran tomak katak, Provizoriamente ne'ebé AIFAESA rekomenda atu la sosa produtu Fós ho marka Manu-Vitoria to'o anúnsiu rezultadu teste laboratóriu tuir mai, ohin AIFAESA fó saiba públiku tomak bele sosa no konsumu hikas fós ho marka Manu-Vitoria refere, tanba rezultadu laboratóriu hatudu di'ak ba ema nia saúde.

Enkoraja ba Operadór Ekonómika no konsumedór sira hotu atubele servisu hamutuk ho autoridade kompeténsia sira hodi bele garante ai-hán ne’ebé kualidade no seguru ba konsumu umanu. (*)