Iha enkontru amizade ne’e realiza, hafoin Xefe Governu Koreia do Súl mak husu Embaixada Timor-Leste iha Xina atu konvoka enkontru entre xefe governu rua hodi bele diskute klean liután apoiu kooperasaun ne’ebé Koreia do Súl fó ba Timor-Leste, tanba Primeiru Ministru Koreia Súl, Han Duck-Soo, hakarak oferese nafatin oportunidade servisu ba Timoroan.

Primeiru Ministru (PM), Kay Rala Xanana Gusmão hato’o agradese mós ba domin husi Governu no Setór privadu simu Timoron rihun ba servisu ho hetan kompeténsia no esperiénsia servisu iha Koreia Súl hodi ajuda hamenus númeru dezempregu iha Timor-Leste.

“Agradese ba sira, simu ita-nia traballadór Timoroan rihun ba servisu iha área barak iha ne’ebá no Primeiru Ministru Koreia hatete, sira hakarak oferese tan área servisu balun ne’ebé sira hakarak akida nafatin”, dehan PM Xanana hafoin enkontru ho PM Koreia do Súl Han Duck-Soo, iha Otél Grand Hyatt Hangzhou-Xina, domingu (24/03/23).

Iha fatin hanesan, Primeiru Ministru Koreia Súl, Han Duck-Soo informa Koreia sei kontinua apoia iha área desportu, no apoia setór edukasaun, saúde no apoia Ministériu Agrikultura no Peskas iha área reflorestasaun hodi kria ambiente ba eko-turizmu ne’ebé di’ak ba Timor-Leste.

Koreia sei kontinua husu nafatin ba Governu Timor-Leste atu kapasita traballadór Timoroan hodi hetan oportunidade atu ba servisu iha Koreia Súl hodi buka esprensia ne’ebé sira bele fahe ba Timor-Leste.

PM Xanana Gusmão sente orgullu tebes ba oportunidade murak partisipa iha ASIAN Games ba dala-19 ne’e bele hasoru ninia nia amigu di’ak hodi diskute asuntu bilaterál rua ne’ebé sei fó benefisiu ekonomiku ba povu no nasaun Timor-Leste.

“Ami ko’alia no ha’u agradese Koreia liuhusi nia Ajénsia KOICA Ajuda ona ita iha Timor-Leste, no sira atu halo kampu treine desportu boot haa iha ne’ebé (Timor-Leste)”, haktenik PM Xanana.

Koreia Súl durante ne’e oferese apoiu hotu ne’ebé ajuda tebe-tebes Timor-Leste iha prosesu kontrusaun estadu no nasaun. Tanba ne’e Estadu Koreia Súl sei kontinua apoiu Timor-Leste sai membru Asosiasaun Nasoins Sudeste Aziátiku (ASEAN).

Enkontru xefe governu rai rua ne’e, termina ho entrega prendas ba malu nu’udar sinal agradesimentu. (*)