Ministru Prezidensia Konselu Ministru Fidelis Leite Magalhaes dehan, apoiu porsentu 60 ba empreza sira so ba de'it iha tempu ne'ebe molok ne'e atividade ekonomia paradu.
Tan ne’e, nia hatete, bainhira atividade ekonomia la'o normal ona, governu sei laiha tan apoiu ba sira.
"Situasaun sai di’ak liu tan loron ba loron, iha planu sanitariu no epidemiolojiku no mós iha planu ekonomika, ne'ebé neineik-neineik sei la'o normal fila-fali, tanba ne'e konsidera katak la justifika ona atu fó nafatin apoiu temporariu hafoin fulan Juñu, ne'ebe kria husi Dekretu Lei numeru 16/2020, loron 30 Abril nian," dehan Fidelis iha palasiu governu, Kuarta (24/06).
Nia esplika, subsidiu 60% ne’ebé governu oferese aplika ba kontratu hirak ne'ebé suspende hela ka reduz tiha periodu normal serbisu iha fulan Marsu, Abril, Maiu no Juñu tinan ida ne’e, no mós kontribuisaun sira referente ba fulan hirak ne'e rasik.