Sekretáriu Estadu Komunikasaun Sosiál (SEKomS), Merício Juvinal dos Reis "Akara" hateten, TL orgullu tanba organizasaun WFP kontinua hamutuk ho TL husi tempu susar to'o agora.

"Ita tenke orgullu, tanba organizasaun internasionál sira hanesan WFP sempre iha ita-nia sorin, apoiu ita," dehan nia, iha Timor Plaza, hafoin halo abertura ba programa WFP nian, Kuarta (29/07).

Nia mós dehan, kona-ba kombate má nutrisaun, la'ós dehan governu prontu ka lae maibé ne'e obrigasaun governu nian.

"Governu tenke halo esforsu hotu-hotu para rezolve ita-nia problema rai-laran, liu-liu problema ekonomia. Indikasaun ida mak, Primeiru Ministru (PM) forma ona ekipa rekuperasaun ne'ebé ko'alia mós kona-ba hahan ba ita-nia komunidade vulneravél sira," tenik Akara.

Iha fatin hanesan, Country Director WFP, Dageng Liu hatete, populasaun TL tomak pursentu 25% mak prienxe kritéria nutrisaun di'ak nian.

"Ita hatene katak TL iha dependesia boot ba foos, maibé ita presiza hatene katak iha TL mós iha hahan nutrisaun hanesan batar, kasava no batata ne'ebé ita bele konsumu mós iha TL," nia tenik.

Nia mós subliña, WFP mós hamutuk Uniaun Europeia, USAID, Koica halo ona estudu ida naran análiza kona-ba lakuna nutriente ne'ebé haree katak pursentu 25% husi populasaun TL mak prienxe kritéria nutrisaun di'ak nian.

Liu dehan, konsumu ai-han iha TL ne'e importante tebes, no mós iha ona programa kona-ba SBCC, oinsá atu komunika para muda ema nia hahalok. 

Entretantu, tuir relatóriu WFP, munisípiu neen ne'ebé WFP halo ona peskiza hanesan Rejiaun Administrativa Espesiál Oekusse Ambeno (RAEOA) ne'ebé númeru aas liu ba má nutrisaun, maibé iha mós munisípiu seluk hanesan, Ermera, Bobonaru, Ainaru, Manufahi no Baukau. (*)