IADE nu'udar institusaun governu ne'ebé estabelese ho dekretu lei nu.24/2012 4, ho knar atu apoiu governu hodi hasa'e profisionalizmu setor privadu iha Timor-Leste, liu husi atividade promosaun, kapasitasaun, akompañamentu, planu, programas, liu husi asistensia teknika emprezarial ba emprezaria mikro kiik no mediu pontesial ne'ebé eziste iha TL.
Ho knar ida ne’e, IADE buka meus oioin hodi kria kooperasaun serbisu ho institiisaun governu, naun governu, ajensia, no parseiru dezenvolvimentu sira hotu, hahú husi koopera, kolobora no serbisu hamutuk atu fasilita no fó apoiu ba asistensia tenknika ba emprezariu sira.
Ho nune’e, iha 24 Agostu, IADE realiza serimonia asina akordu ho Serve no Fini Klibur IOB.
Diretór IADE Filomeno Marcelino Belo hatete, asina akordu ne’e ho objetivu atu fasilita emprezariu iha munisípiu asesu ba serbisu verifikasaun dadus emprezarial ho lais no kualidade, no IADE atu fasilita formasaun emprezarial ba area jestaun negosiu ba membru Fini Klibur IOB.
Nia dehan, iha tinan kotuk, IADE mós asina akordu hanesan ho parseiru lubuk ida, hanesan BNCTL, atu fasilita kliente sira asesu ba kreditu, no ho ILO hodi halo formasaun ba kontraktor sira iha munisípiu Manatuto no Lautem.
"Alende ne'e ita iha akordu ida ho NGO Tomak no Plan, ho Ministeriu Agrikuktura hodi fasilita ita-nia toos-nain sira iha projetu ho naran ‘toos ba moris di’ak’," dehan Filomeno iha edifisiu IADE, Mandarin, Dili, Segunda (24/08).
Aleinde akordu hirak ne’ebé halo ona, nia hatete, iha tempu badak IADE sei asina tan akordu ho ONG ANZ, ILO, no MTKI.
"Barak ka oitoan ezistensia IADE iha nasiónal no sentru dezenvolvimentu sira iha munisípiu kontribui ona ba prosesu dezenvolvimentu ekonomia no liu-liu benefisiu husi mikro kiik no mediu, no durante ne'e hetan ona asistensia husi IADE," dehan Filomeno.
Maske nune’e, Diretór IADE ne’e mós hato’o dezafiu ne’ebé durante ne’e IADE hasoru, hanesan alokasaun orsamentu jeral estadu ba IADE kada tinan ne’ebé sempre menus, limitasaun rekursus umanus no post-kapasitasaun rekursus umanus, no limitasaun atu asesu ba fasilidades infra-estrutura baziku hodi bele apoiu serbisu IADE iha terenu.
