Xefi Jestaun Merkadu Taibesi, Anibal de Jesus hateten, produtu lilin no aifunan liuliu primadona oras ne’e daudaun hahú folin ligadu ho selebrasaun loron matebian, kada tinan jestór merkadu fó espasu atu vendedór sira fa’an produtu ne’e.
"Vendedór sira hetan rendimentu husi lilin no aifuan tanba loron boot matebian nian," Anibal de Jesus ba www.tempotimor.com iha nia knaar fatin Merkadu Taibesi Dili, Sesta (30/10).
Anibal hato'o ona karta ba autoridade munisípiu Dili hodi autoriza vendedór sira fa’an produtu ne'ebé folin, ligadu ho selebrasaun loron matebian nian.
Alende lilin no ai-funan iha mós produtu hanesan nesesidade bázika hanesan masin midar, sabaun inklui ropa ne'ebé mós folin tebes.
Anibal mós halo komprasaun ho loron bain leet, maski movimentu rame, maibé rendimentu menus ligadu ho loron boot ne'ebé rendemintu ekonomia aumenta.
"Loron bain leet ne'e movimentu bele barak, maibé rendimentu ladun iha," Anibal hateten.
Iha fatin hanesan, Jaquelino Ximenes nu'udór vendedór hateten, nia faan lilin tanba maioria kompradór atu ba munisípiu hodi selebra loron matebian.
"Loron ida faan doos haat bele hotu, depende ita fa’an mak tenki badinas," Jaquelino hateten.
Tuir observasaun www.tempotimor.com iha merkadu Taibesi nota katak, vendor sira barak mak fa’an lilin inklui aifunan ba kompradór sira ne'ebé mak hahú viajen ba munisípiu.
