Nia dehan, Cesta Bázika nu'udár komponente ida importante hodi rekopera ekonomia, tanba ne'e kona-ba presu, presíja haree didi'ak tanba estabelesimentu ba Cesta Bázika mosu kedas ho hanoin ida kona-ba atu halo rekoperasaun ekonomia.

"Setór privádu sira durante ne'e servisu iha área ida ne'e, sira mós bele sente hetan lukru oitoan para sai hanesan modal sira nian no investimentu sira nian bele hakat ba oin. Ne'ebé ha'u hanoin katak, iha presu mudansa oitoan iha fós rai ou iha produtu lokál sira, ne'e ha'u bele hateten katak, tanba kestaun rekoperasaun ekonómiku ita bele hateten ne'e normál", Augosto Junior Trindade hateten ba jornalísta sira iha nia kna'ar-fatin, Kinta (07/01).

Tuir nia, governu iha polítika ne'ebé di'ak hodi kria programa rekoperasaun ekonomia ba povu, tanba produtu sira hanesan hare-kulit, koto, foremungu, fore-keli ne'ebé durante ne'e rai de'it, agora komesa lori ona mai merkadu ho presu ne'ebé di'ak, maibé presíja haree mós iha ninia implementasaun.

Nia mós dehan, governu fó duni atensaun másimu ba agrikultór sira no sente katak iha situasaun refere, sira bele hetan fali retornu ruma tama ba sira nia uma-laran hanesan kapitál ba sira atu bele book aan.

Tanba rekuperasaun ekonómia iha cesta baziku sei labele akontese kada tinan, maibé iha situasaun susar mak governu foin realiza, maibé ho intensaun atu fó fali konfiansa ba seitór privadu sira hodi bele moris nafatin, eziste nafatin maske ho valór osan ne’ebé naton.

"Entaun ha'u haree katak, buat ne'e di'ak, agora entermus-de-presu iha liña ministeriais sira ho ida ho seluk la hanesan, ida ne'e presíja ita tuur hamutuk para ita diskute hodi haree", nia dehan.

Lider másimu CLN ne’e hatutan, iha rekoperasaun ekonómika ne'e presíja haree mós nia vantajen ba rekupera ekonomia agrikultór sira sente ka la’e, intermediáriu ne'ebé halo negósiu sente iha duni kapitál ba sira hodi halo negósiu iha futuru ka la’e.

"Benefisiáriu sira, ita nia populasaun sira simu duni buat ida ne'e ho kontente ka la’e. Ha'u hanoin ida ne'e maka bele sai hanesan sasukat ida ba ita hotu", nia hakotu. (*)