Programa ne’e fahe husi kompaña TIL TEC, Unipesoal,Lda ba komunidade sira ne’ebé pretende ba Suku Bekora.
Xefe Suku Bekora, António da Silva Soares hatete, Aldeia Darlau ho totál família 214, mak la'o ain, tanba estrada afeita husi inundasaun karreta ba mai la di'ak.
Maske, aldeia Darlau, baliza ho Suku Asmau, Postu-administrativu Remexiu, Munisípiu Aileu, maibé sira mai to'o iha Sede Suku Bekora hodi simu Sesta Bázika.
"Ami-nian Suku Bekora ne'e, aldeia 5 mak seidauk, ne'e mak ohin dia 21, aldeia Darlau dok, maibé populasaun la'o ain 7 ou 8 kilometru tun-sa'e foho mai to'o iha ne'e (Sede Suku) hodi simu”, dehan nia iha Sede Suku Bekora, kuarta (21/04).
Tanba, populasaun sira la'o gasta enerjia, mak komunidade husi aldeia Darlau tenke simu hotu iha loron ida nia laran.
"Ohin loron ne'e, ha'u ko'alia ho kompaña katak, labele halo kole ema, tanba mai to'o iha ne'e, la hotu, aban tun fali mai, sa'e-tun, kasian ba sira", haktenik nia.
Nune'e mós, na'in ba kompañia TIL TEC, Unipesoal Lda, Adelino Soares Godinho, deside atu ba fahe direita iha sira nia fatin iha aldeia Darlau, maibé estrada kotu karreta ba la di'ak.
"Iha semana kotuk, ami survei ba sira-nia área ne'eba para fornesementu direita ba sira-nia lokasi, la di'ak, tanba kondisaun foin lalais afeitadu ne'ebé estrada mak la favorese ami atu ba, ne'ebé ami konsulta fali Xefe Aldeia ho Xefe Suku, sira rasik deside katak, iha de'it Sede Suku, komúnidade sira tun mai foti rasik", nia afirma
Amaro de Jesus Marcal hanesan benefisiariu husi Aldeia Darlau, sente kontente ho ai-han hirak ne'ebé Governu fahe liuhusi programa Sesta Bázika.
"Buat sira estádu fó mak hanesan, masin, mina, rinso, forkeli, fore-rai, trigu, batar, indomilk, no seluk tán, ami sente pas kada ema ida hetan hanesan ne'e, ami sente kontente duni”, dehan nia.
Seku Bekora, kompostu husi Aldeia 10, ho totál família rihun 514, no populasaun rihun 22.587. (*)