Koordenadór Jerál EKSES covid-20, Mario Tilman hatete, estudante sira ne’e iha feto 42 no mane 37 atu fila ba Munisípiu, tanba hasoru problema aí-han durante serka sanitária.

“Alin sira komesa ona enfrenta problema hanesan ai-hán laiha, osan. Ida ne'e mak ami koko lori sira fila ba Munisípiu, maibé ida ne'e mós ami lá obriga, se mak hakarak fila ami prontu atu fasilita lori sira ba”, afirma Mario iha Sede Renetil Palapasu, sesta (21/05)

Estudante sira sei la kuaretena iha Covalima tanba iha dokumentu teste swab no guia de marsa hodi halo viajen ba Munisípiu.

Iha fatin hanesan, Martino Gusmão Alves, nu'udar Koordenadór EKSES Covid-20 Munisípiu Covalima hatete, dadus husi estudante sira ne’e rekolla kuaze fulan ida nia laran.

"Ami la obriga sira maibé ami fasilita sira oinsá sira hadook-an husi problema hirak ne'e, durante ne'e ami organiza sira ba tuir teste swab ona, rezultadu iha tiha mak ami trata fali sira nia dokumentu ba guia de marsa”, afirma nia.

Entretantu estudante, Cornelia Cardojo, sente kontente tanba bele sai ona husi problema hamlaha ne'ebé durante ne'e nia enfrenta iha Dili.

“Fila ba ha'u-nia rai tanba situasaun mak obriga tebes ami, iha serka sanitária ne'e ami hasoru problema barak hanesan hamlaha no seluk tan. Ha’u sente kontente mós tanba bele sai ona husi situasaun ne'e”, dehan nia.

Aliende ne’e, emprezáriu Covalimaoan sira iha kapitál Dili mós prepara transporte atu bele tula fila estudante hirak ne’e. (*)