"Ajudu ba suku Balibar, aldeia Tankai hamutuk 37, entre 37 ne'e iha vítima na'in-2 mak grave no sasán aat totál, nune'e nia konsege simu sasán kompletu”, dehan Xefe Departamentu Jestaun Emerjénsia, Ermelinda Pires iha sede-suku Balibar, segunda (24/05).
Sasán Sira ne’ebé fahe hanesan, kalen 50, semente 25, besi beton 12, pregu, ai-ramen no sasán seluk tan ne'ebé liga ho konstrusaun uma.
"Sasán sira ne'e mak apoiu ba ema hamutuk 37 no ohin na'in-2 simu ona simboliku no na'in-35 seluk seluk sei ba foti iha armajen Vitória Dili", infoma nia.
Apoiu ba rekoperasaun ne'e nivel tolu hanesan, aat totál, aat naton, aat kaman nune'e aat totál simu sasán kompletu, aat naton simu kalen, pregu ba ai no ba aat kaman simu de'it kalen ho pregu .
"Ba sira ne'ebé hetan estragus, Gasto ba sasán konstrusaun ne'e kada ema ida gastu osan $US477.00”, dehan nia.
SEPS mós iha Osan maun de Obra ho ai kuadradu, ne'e iha US$356.00, maske material sira bele simu maibé osan sira sei kontaktu fali ba xefe suku atu wainhira orsamentu aprova ona sira la'o ho ida ne'e
"Ba ema ne'ebé hetan dezastre naturais hanesan, aat totál hetan US$356.00, aat naton $356.00 no aat kaman US$150.00", hatutan Ermelinda.
Iha fatin hanesan, Xefe suku Balibar, Afonso Pereira deklara, nia sente kontente no orgullu tebes tanba iha loron 4 fulan-abríl dadus ne'ebé lori ba entrega iha SEPS hetan duni rezultadu.
"Ami autoridade ho komunidade sente kontente tanba buat ne'ebé ami husu la monu leet ba rai maibé iha realidade duni", katak nia.
Nune'e, komunidade ne'ebé afetadu hamutuk na'in-37 maibé ohin na'in-2 simu ona simbolik husi governu no na'in-35 seluk sei ba foti iha armajen Vitória Dili.
"Ami ba survey hatudu duni katak, sira na'in-2 ne'ebé ohin simu sasán konstrusaun hetan estragus totál no durante ne'e sira hela ho sira-nia família", deklara Xefe suku.
Antes ne'e iha ajénsia balun husi St.Antonio ho Timorgap mai foti ona dadus maibé to’o agora seidauk hetan apoiu.
"Foin primeiravez hetan apoiu husi protesaun sivil”, konta nia.
Entretantu, Komunidade ne'ebé hela iha sede-suku Balibar, postu-administrativu Kristu Rei, Munisípiu Dili, kompostu husi aldeia haat hanesan, aldeia Tankai, Loriku, Fatuloda, Lakoto ho populasaun hamutuk 1673 no xefe família 347. (*)
