Ministru Prezidensia Konsellu Ministru, Fidelis Leite Magalhães hatete, valór ba funsionáriu sira ne'ebé mak iha liña frente sei hetan finansia husi Funu Covid-19 tuir nia variasaun entre dolár amerikanu 5 to’o 25 kada loron.
“Valór suplementu remuneratóriu ida ne’e, sei finansia husi Fundu Covid-19 nian, variasaun entre dolar amerikanu 5 to’o 25 kada loron, tuir grau risku sira ne’ebé funsionáriu sira hasoru, tuir tabela ne’ebé aprova ho diploma ida ne’e”, informa Fidelis hafoin reuniaun Konsellu Ministru iha Palásiu Governu, kuarta (04/08).
Iha alterasaun ne’e, lista kategória traballadór benefisiáriu sira sei revee filafali, hanoin ba traballadór sira ne’ebé hala’o sira-nia atividade oioin iha kondisaun direta espozisaun ba vírus SARS-CoV-2.
Tanba ne’e prevé ona iha Dekretu-Lei anteriór, liliu ho inkluzaun husi tékniku sira ne’ebé envolve ona iha programa vasinasaun kontra Covid-19, guarda prizionál no koveiru sira, entre seira seluk, ne’ebé mak la abranje to’o oras ne’e.
Alterasaun hirak ne’ebé prevé iha diploma ne’e prodúz efeitu hahú husi loron 30 fulan-abríl tinan 2020, data tama iha vigór husi Dekretu-Lei ne’ebé oras ne’e altera.
“Direitu ba suplementu sira ne’e sei prolonga to’o loron 31 fulan-dezembru tinan 2021, sein prejuizu ba posibilidade posteriór hodi halo estensaun liuhusi intervensaun lejizlativa foun”, dehan nia. (*)