“Husi totál orsamentu US$33,723,731 ne’e, sei finansia ba programa tolu (3), sub-programa lima (5) no atividade 21. Programa prinsipál tolu mak dezsentralizasaun administrativa no poder lokál, boa governasaun no jestaun institusionál, inklui igualdade jéneru no inkluzaun sosiál,” dehan Ministru Asministrasaun Estatal Minguel Pereira de Carvalho, hafoin finaliza audénsia públika ba proposta OJE 2022 ho Komisaun A trata asuntu justisa no konstituisionál iha Parlamentu Nasionál (PN), sesta (05/11).

Ba OJE 2022 ne'ebé iha, parte MAE mós sei aloka uitoan ba programa uma ba povu liliu ba populasaun sira-ne’ebé kbi’it la’ek. Alende ne’e, aloka mós ba programa momentu hafoun aldeia.

Iha tinan 2022, MAE nia programa prioridade tolu mak dezsentralizasaun administrativa no poder lokál sei gasta US$24,201,199, boa-governasaun no jestaun institusionál sei gasta US$9,496,016 no igualdade jéneru no inklusaun sosiál sei gasta US$26,516.

Nune’e mós programa dezsentralizasaun administrativa no poder lokál, ho nia objetivu médiu prazu, hodi garante ba implementasaun efetivu husi dezsentralizasaun administrativa no poder lokál.

Programa ne’e ho nia sub-programa dezenvolvimentu lokál, ho atividade supervisiona atividade ba dezenvolvimentu lokál, jestaun ba programa nasionál dezenvolvimentu suku (PNDS), apoiu ba administrasaun suku, inklui koordena planeamentu ba dezenvolvimentu integradu munisipál nomós programa sira seluk. (*)