Dadauk traballador hirak ne'e, Sekretáriu Formasaun Profisionál no Empregu (SEFOPE) liuhusi Diretór Jerál, Paul Alves, Xefe Gabinete interinu SEFOPE, Agusto de Jesus Alves, reprezentante kompaña airline, no Diretór Diresaun Nasionál Empregu Exteriór (DNEE), Filomeno Soares, sesta (03/12), deside hala’o enkontru ho família traballadór Korea Súl na'in-65 iha salaun SEFOPE Bekora.
Diretór Diresaun Nasionál Empregu Exteriór, Filomeno Soares hatete, husi enkontru ne’e, simplesmente atu konvida traballadór sira-nia família, mai asina deklarasaun ho Governu atravesa liuhusi SEFOPE, nune’e bele iha hotu responsabilidade ba traballadór sira.
"Deklarasaun ne’ebé ohin ita asina siknifika katak ita prontu atu husik, ita-nia oan, ka ita-nia kaben sai husi ita-nia sorin hodi ba servisu iha Korea Súl”, dehan nia iha salaun SEFOPE Bekora.
Pozisaun Governu so kria de’it kondisaun atu haruka Timoroan sira ba servisu iha estranjeiru, maibé kuandu mosu problema ruma, parte família no Governu tenke iha hotu responsabilidade hodi rezolve.
Tanba timoroan sira ba servisu ne'e manán osan nomós bele aprende ema nia matenek iha nasaun seluk, nune’e fila mai bele diversifika ekonomía família no nasaun, no la’ós servisu permanente.
Husu família traballadór sira hotu iha Timor-Leste, bainhira sira-nia oan ka sira-nia la’en haruka osan mai sira, presiza utiliza ho didi’ak, tanbá antes hetan osan, sira hasoru servisu ne’ebé todan tebes.
Entretantu traballadór na’in-neennulu-resin-lima (65) ne’e, kompostu husi área peskas ema na’in-ruanulu-resin-lima (25) no área fábrika ema na’in haatnulu (40), ne’ebé tuir planu sei aranka ba servisu iha Korea Súl iha loron 6 dezembru 2021. (*)