"Tempu udan ne'e ami preukupa, fatin ami hela ne'e provizóriu iha fatin ki'ik ami familia rua mak iha ne'e, ami husu protesaun sivil bele karik ajuda ami fó matérial halo uma nian para ami halo fali ami nia uma", dehan jacinta ba www.tempotimor.com, domingu (19/12).
Maibé, hanesan apoiu emerjénsia simu ona husi parte diresaun servisu protesaun sivil Munisípiu Baukau iha loron 11 fulan-Outubru tinan-2021.
Inséndu ne'e, akontese vítima la konsege salva sasan sira iha uma laran, tanba uma-4 ahi-han to'o mutuk hotu.
"Buat hotu ami la salva, osan ha'u nia rasik US$850 maun sira nia mós iha, maibé ha'u la sura, i sasan sira iha uma laran nian hanesan haré kulit, fore-rai, osan, no roúpa hatais nian, tanba ne'e atu halo fali uma mós ami forsa laiha ona", nia hatete
Nune'e, vitíma insendu, Petronela Coa mós husu ba SEPS atu fó apoiu matérial re-konstrusaun uma nian atu bele hari'i hikas uma hodi hela permanente.
"Ami iha ne'eba ami nia oan barak hela iha ema nia uma mós ami sente, nune'e ami mai hela iha to'os laran hamutuk nain-20", nia afirma
Fatin provizoriu iha to’os laran ne’ebé dadaun sira hela, nafatin sai preukupasaun boot, tanba uma ho medida ki'ik, maibé iha membru família barak.
Insendiu ne’e, akontesse iha loron 10 Fulan-Outubru tinan 2021 maizoumenus tuku 01:30 (meudia) oras timor-leste iha Aldeia Luliheni, Suku Bukoli, Postu Administrativu Baukau Vila, Munisípiu Baukau. (*)