“IJE halo poupansa ba tinan kotuk (2021), $7 milhões ba serbisu sira ne’ebé mak IJE nia atividade diáriu durante ne’e la’o, segundu progresu ne’ebé la’o loke Estrada foun totál estrada 252 kilómetru”, informa Hermenegilda hafoin hasoru malu ho PM Taur iha nia rezidénsia Farol, segunda (07/02).
Iha audiénsia ne’e relata serbisu IJE nian iha tinan 2021 nian nomós aprezenta planu ba tinan 2022 nian, liuliu atu loke estrada ba populasaun sira ne’ebé presiza.
“Ohin ha’u enkontru ho Sua Eselénsia Señór Primeiru Ministru relata mós relatóriu atividade ne’ebé mak la’o ona iha tinan kotuk 2021, progresu serbisu ne’ebé mak iha nomós preparasaun IJE, IP nian ba iha tinan ida ne’e e planu hirak ne’ebé mak atu la’o iha tinan ida ne’e”, dehan nia.
Ba progresu ne’ebé IJE-IP finaliza iha tinan kotuk, mak normaliza estrada rurál, loke estrada foun ba Aldeia no Suku ne’ebé hato’o pedidu, normalizasaun mota, ateru estrada, tantu ba interministerial, relijioza, komunitária no Universidade sira.
IJE mós iha planu atu hadi’a mákina pejadu sira ne’ebé aat no sosa foun, nune’e bele apoiu komunidade sira iha rurál ne’ebé presiza estrada ba to’o sira-nia Aldeia ka Suku.
Dezde 2018, IJE simu ona pedidu hamutuk 500-resin no hatán ona ba pedidu 200, enkuantu sei hela pedidu 300, no sei esforsu atubele hatán hotu pedidu sira ne’ebé tama, maibé haree filafali mós ba ekipamentu ne’ebé iha. (*)
