“Ohin ita halo reuniaun interministeriál ba dala rua atu haree simu relatóriu sira ne'ebé grupu tékniku halo servisu tinan kotuk nian e ho reuniaun ida ne'e atu update ba membru sira Governu sira ne'ebé hola parte iha komisaun interministeriál ba prosesu adezaun Timor-Leste nian ba Organizasaun Munidál Komérsiu”, dehan Ministru Koordenadór Asuntu Koperasaun Ekonomia (MKAE), Joaquin Amaral, iha Ótel Novo Turismo, Lesidere, tersa (08/02).

Ho informasaun sira ne'ebé iha ona relatóriu hodi update ba ministériu hotu hola parte iha interministeriál no iha mós relatóriu atualizadu husi sekretariadu tékniku iha Zenebra kona-ba kontinuasaun asisténsia téknika ne'ebé OMK sei fó mai Timor-Leste.

“Ita iha rekejitu ne'ebé ita halo e buat lubuk ida mak ita tenke halo iha tinan ida ne'e mak kona-ba ita-nia preparasaun atubele hakat ba negosiasaun bilaterál, kona-ba Timor-Leste nia oferta ba erkadu produtu no merkadu servisu”, informa nia.

Tanba atu loke Timor-Leste nia merkadu ba produtu nomós servisu ne'ebé mak internalmente tenke prepara haree atu Timor nia oferta tau ba dokumentus haruka ba, nune'e bazea ba oferta sira ne'e mak Timor-Leste avansa ba negosiasaun atu loke merkadu ba produ no servisu.

"Obstaklu konserteza kontinua iha, maibé ita tenke haree obstaklu hanesan parte dinámika husi prosesu ne'e, liuhusi asisténsia téknika atubele fasitalita ita-nia ekipa sira”, dehan nia.

Ba servisu sira ne’e ho alvu ida ne'ebé ambisionál tebes bele halo buat hotu la'o di'ak atu tinan 2022 ka tinan 2022, Timor-Leste bele adere ona ba organizasaun mundiál komérsiu.

Embaixadora Timor-Leste ba Zenebra, Lurdes Besa hatete, Timor-Leste hatudu progressu ne'ebé pozitivu tebes tanba hakat ona espasu lubuk atu sai membru ba OMK, ba dadaun ne'e atu tama tan ba prosesu kritiku balun.

“Enkontru hotu ne'ebé ami komisaun halo iha Zenebra ita nota katak ita iha suporta maka’as ba prosesu tomak, nune'e iha tempu badak ita bele atinje objetivu ne'ebé atu sai membru OMK nian”, dehan Lurdes liuhusi Zoom Meeting. (*)