Deklarasaun konjunta ne’ebé www.tempotimor.com asesu iha loron segunda (21/02) katak, liuhusi sorumutuk Primeiru-Ministru Timor-Leste, Taur Matan Ruak, no Primeiru Ministru Austrália nian, Scott Morrison, hala’o iha loron kinta (17/02) husi virtualmente.

Iha enkontru ne’e, Primeiru-Ministru na’in-rua fó-sai inísiu ba faze tinan lima foun nian, atu apoiu ba setór saúde iha Timor-Leste, ho valór dolar australianu millaun 30, atu hametin prestasaun servisu hodi kuidadu saúde primáriu sira, ne’ebé inklui hadi’a nutrisaun, ijiene no saneamentu, no saúde sexuál no reprodutiva.

“Primeiru-Ministru sira konkorda atu serbisu hamutuk hodi apoiu rekuperasaun ekonomia hafoin pandemia gobál ne’ebé afeta nasaun sira iha mundu inklui Timor-Leste no Austrália”, dehen iha deklarasaun konjuntu Primeiru Ministru Timor-Leste, Taur Matan Ruak ho Primeiru Ministru Austrália nian, Scott Morrison.

Ho ida ne’e, Austrália disponibiliza ona dolar australianu millaun 30 hodi fó apoiu orsamentál no ajuda sira seluk ba Timor-Leste hodi mantein servisu sira no ba atividade ekonómiku durante krize, ne’ebé inklui finansiamentu ba Programa Nasionál suku (PNDS) Timor-Leste nian, ne’ebé permite konstrusaun infraestrutura komunitária sira hanesan sistema irrigasaun, ponte ki’ik sira, no estrada sira ne’ebé resin katoluk rua ba aldeia sira hotu Timor-Leste nian.

Ekontru ne’e, Primeiru-Ministru sira rekoñese ona importánsia atu reforsa infraestrutura esensiál sira hodi promove ba prosperidade ekonómika Timor-Leste nian ba tempu naruk.

Primeiru Ministru (PM), Taur Matan Ruak hato’o kompromisu Timor-Leste nian ho implementasaun ligasaun Súl Kabu Submarinu husi Timor-Leste ba Austrália, hodi permite servisu sira internet nian ne’ebé lais liu, fiável liu no asesível liu ba konsumidór sira no empreza sira Timor-Leste nian, hahii ba oferta Austrália nian ba apoiu adisionál kona-ba konkretizasaun husi ligasaun ida-ne’e ba kada kabu.

Primeiru Ministru, Morrison konfirma ona katak Austrália mós sei fó apoiu kona-ba reabilitasaun Aeroportu Internasionál Dili nian ne’ebé sei hala’o.

Aliende ne’e, PrimeiruMinistru sira louva ba anúnsiu ne’ebé halo husi Diretór Ezekutivu Qantas, Alan Joyce, katak kompaña aérea ida-ne’e sei estabelese rota komersiál permanente ida entre Darwin no Díli, ho númeru krexente vou sira-nian, tuir Akordu foun Servisu Aéreu sira Austrália ho Timor-Leste.

Ba vou foun sira ne’e, sei aumenta oportunidade sira ba komérsiu, turizmu no mobilidade laborál entre nasaun rua. Iha ne’e mós diskute ona importánsia mobilidade laborál iha promosaun rekuperasaun ekonómika iha país rua-ne’e.

Timor-Leste iha rezerva traballadór ne’ebé vasina ona ho totál liuhusi 6.500 no prontu atu mobiliza sira ba Austrália. Hein katak prokura boot traballadór sira iha Austrália sei provoka aumentu boot númeru traballadór timoroan sira-nian iha tinan 2022 ne’ebé emprega iha ámbitu eskema Mobilidade Laborál Pasífiku no Austrália (PALM). (*)