Tuir pontu fokál Sekretáriu Estadu Juventude no Desportu (SEJD) munisípiu Ermera Marcelino Maia de Deus hatete, loloos estadiun kafé Ermera la merese atu sai fatin izolamentu, tamba fatin ne'e uza ba desportu.

"Loloos ne'e estadium ne'e la merese sai fatin izolamentu, maibé ho situasaun ne'ebé agora daudaun ita iha ho ema ne'ebè afeta no positivu ona ba Covid-19 nune'e fatin refere fasilita ba sala izolamentu. Tanba liuhusi liña diretór ho administrasaun deside ona katak uza fatin ne'e hasnesan sala izolamentu, nune'e SEJD sedauk hetan informasaun lolos, maibé ekipa integradu ho autoridade diretamente fó pedidu mai ha'u, nune'e ha'u rasik informa ba SEJD inklui diretór sira," dehan nia ba www.tempotimor.com iha estadium Kafe Gleno, Kinta (15/4).

Nia akresenta, situasaun ne'e halo diretór no membru sira duvida, maibé Sekretáriu Estadu Juventude no Desportu (SEJD) Abrão Saldanha fó ona despaxu hodi utiliza estadium refere, maibé utiliza provizóriu de'it.

"Husi pedidu ne'e husu atu servisu hamutuk ho Ministériu Saúde (MS) nian, tanba liña kordenasaun entre SEJD no ekipa integradu klaru ona katak, ohin loron fatin refere sai ona izolamentu Covid-19 iha munisípiu Ermera," nia reforsa.

Enkuantu Diretór saúde munisípiu Ermera Antònio de Deus Fatima afirma, daudaun ne'e pasiente Covid-19 na'in 17 mak ozola hela iha izolamentu estadiun Kafé Ermera.

"Pasiente positivu 17 mak iha sala izolamentu iha edifísiu kafé Ermera, maibé pasiente balun sedauk evakua mai, maibè ekipa nafatin esforsu no kona-ba sala izolamentu sufisiénte atu fasilita ba pasiénte sira karik númeru Covid-19 kontinua, tamba fatin refere seguru no iha fatin balu mak seidauk uza," nia dehan.

Entretantu dadaun ne'e munisípiu Ermera rejista ona kazu pozitivu Covid-19 hamutuk na'in 34 ne'ebé na'in 17 halo ona izolamentu iha estadium Kafé Ermera, balun iha izolamentu Tasi-Tolu no balun kontinua abandona iha komuninia leet.(*)