“Rezultadu votasaun a-favór 52, kontra no abstensaun 0 nune'e projetu-lei númeru 41/V (4a)-Kódigu Direitu Autór aprova iha faze jeneralidade”, dehan Prezidente Parlamentu Nasionál, Aniceto Longuinhos Guterres Lopes, hafoin anunsia Rezultadu votasaun iha Plenária PN, segunda (20/06).

Ba Projetu ne’ebé mak aprova husi deputadu sira iha Parlamentu Nasionál mak meza sei haruka filafali ba komisaun G hodi kontinua halo diskusan iha faze espesialidade.

Bazeia ba relatóriu paresér ne'ebé fó sai husi komisaun G trata asuntu Edukasaun, Juventude, Kultura no Sidadania, katak projetu-lei KDA ne’e sei fó protesaun ba artista husi área hothotu tanba diversidade artístika ne’ebé eziste iha Timor-Leste.

Aleinde ne'e projetu-lei ne’e kumpre ona regra rejimentál no konstituisaun tuir analiza ne’ebé komisaun hala’o hodi fó ba PN atubele aprova iha jeneralidade no kontinua diskusaun ba espesialidade.

Ministru Ensinu Superiór Siénsia no Kultura (MESSK), Longuinhos dos Santos hatete, nia parte hato'o apresiasaun ba deputadu ne’ebé hanoin dezenvolve lejislativa ne’e atubele proteje artístika no produtór husi obra orijinál iha Timor-Leste.

Iha ne'e Governu mós hanoin katak husi inisiativa hirak ne'e importante tebes atubele kumpre kompromisu ne’ebé prevee ona iha konstituisaun hodi bele garante protesaun, kriasaun, produsaun no komersializasaun ba obra literasia sientífika, artístika direitu autór sira-nian.

Nune'e mós diploma ida-ne’e importante loos ba nesesidade urjente no fundamentu ba dezenvolvimentu Timor-Leste ho ninia alineamentu ho kontestu internasionál ne’ebé nasaun seluk vigora hela liliu ko’alia kona-ba direitu autór nian no direitu konexu ne’ebé garante ba kriadór literária, artístiku no sientífiku atu iha baze ida hanesan riku soin fundamentál nasaun nian, ne’ebé nia hun mai husi kreatividade sidadaun sira-nian.

Entretantu Projetu-lei Kódiku Direitu ba autór ne'ebé inisia husi Parlamentu Nasionál iha artigu hamutuk 222. (*)