Sidadaun Estranjeiru na’in-2 ne'e ho naran inisiál AES ho IGAE, ne’ebé halo kolaborasaun ho autór tráfiku umanu na’in-tolu ne’ebé PSIK kaptura iha ‘area juridika Munisípiu Dili, kuarta (22/06).

“Iha intervensaun ajensia ida iha Indonézia, ho maneira Polísial ida ne’ebé sira halo kolaborasaun husi Arguidu sira entaun ita konsege hetan sira na’in-rua, sira na’in-rua mak hala’o hela kna’ar ajensia ida iha Indonézia hodi simu sidadaun Timoroan sira ba Indonézia, to’o ikus mai distribui ba Abu Dhabi”, dehan Koordenadór Investigadór PSIK, Adino Nunes Cabral, iha Edifísiu PSIK, Kaikoli, sesta(24/06).

Nune'e PSIK simu informasaun, koloka kedas ekuipa iha Aeroportu simu sira na’in-rua, lori mai uza kompeténsia Timor-Leste nian ba 12 horas de tempu.

“Ohin ita husu kedas ba Ministériu Públiku (MP), lori ba asaun penál atu solisita ba tribunál atubele hasai mandadu detensaun fora de mandadu kontra suspeitu na’in-2”, informa nia.

Ajensia ne'ebé sira hakna’ar-an ba ne'e, sei segredu justisa tanba prosesu ne’e la’o ona, em prinsípiu ajensia ne'e eziste iha Indonézia hodi simu Timormoan sira husi ne'e depois sira kanaliza ba Abu Dhabi.

“Ita foin mak deskobre sira ba dahuluk, em prinsípiu sira na’in-rua ne’e mak sai hanesan autór prinsipál ne'ebé mak durante ne’e halo komunikasaun ho autór sira iha Timor-Leste hodi transporta ita-nia timoroan sira ne’ebé hamutuk na’in-7 to’o agora sai vítima iha Abu Dhabi ne’eba”, afirma nia.

Antes ne’e, PSIK ne’ebé simu Mandadu hodi ezekuta orden husi Tribunál Distritál Dili kona-ba buska no halo detensaun ba autór na’in-tolu ho Númeru úniku Krime (NUK) 0248/22/PSIK iha loron 22/06, iha área juridika Munisípiu dili.

Tuir observasaun iha tereinu ne'ebé www.tempotimor.com haree autór na’in-tolu ne’e PSIK kaptura husi fatin ne'ebé  la hanesan iha área Dili laran, mak autór ho insiál MV, kaptura iha área Benfíca Dili, iha tuku 12:33, oras meiudia, autór HDS kaptura iha área Komoro, iha tuku 15:02 no autór ho inisiál JG, PSIK kaptura iha Aldeia Faulara, Suku Bebonuk, Postu Administrativu Dom Aleixu, Munisípiu Dili.

Hafoin kaptura autór na’in-tolu ne’e ekipa PSIK halo kedas buska ba sira-nia fatin servisu iha área Kampun Baru hodi halo aprensaun ba materiál sira hanesan dokumentu sensitivu sira ne’ebé mak durante sira uza halo servisu inklui leptop ida ho printer ida no rezidénsia halo mós aprensaun ba autór na’in-tolu nia pasaporte hodi evita labele halai sai husi Timor-Leste.

Fatin ne'ebé PSIK halo buska ne’e nu'udár mahon ba autór sira hodi halo atendimentu ba juventude timoroan sira ne'ebé mak hakarak rejista naran inklui submete dukumentu sira, hodi ba servisu iha estranjeiru.

Tanba ne’e envolvimentu autór sira-nian ba kazu krime tráfiku umanu ho asosiasaun kriminiza ne'e, previstu iha artigu 163, númeru 1, alinea (d) ho (e), Lei Kódigu Penál Timor-Leste.

Hafoin halo ezekusaun ba mandadu detensaun no buska ekipa PSIK kontinua transporta autór na’in-tolu ba edifísiu PSIK hodi detein iha sela durante ora 72 hafoin aprezenta ba Tribunál Distritál Dili hodi tuir interigatóriu dahuluk mak tribunál sei deside, tanba kazu ne’e servisu PSIK simu informasaun katak, iha ajénsia balun komete kazu tráfiku Umanu ho grupu organizadu.

Iha komferénsia Imprensa Koordenadór Investigasaun PSIK, Adino Nunes Cabral hatete, kazu ida-ne’e sidadaun timoroan na’in-tolu mak sai autór hodi komete, bosok timoroan feto na’in-7 fasilita no lori ilegalmente ba servisu iha Nasaun Emirados Árabes Unidos.

“Vítima família sira mai hato’o keixa ba ami, hafoin ida-ne’e ami rekolla informasaun hato’o auto notísia ba Ministériu Públiku (MP), atu solisita mandadu ba tribunál halo detensaun ba suspeitu na’in-tolu komete krime tráfiku umanu”, dehan Adino, iha Edifísiu PSIK Kaikoli, kuarta (22/06).

Kazu ne’e iha ligasaun ida boot ho nasaun sira iha estranjeiru, tanba ajensia balun iha Timor-leste, parte PSIK labele temi naran (segredu justisa), maibé ajensia ne’e iha Timor-Leste jere husi timoroan iha ligasaun ho ajensia ida iha Nasaun Indonézia mak halo komunikasaun ho ajensia sira iha nasaun Emirados Árabes Unidos hodi haruka timoroan sira ba servisu.

“Ajensia sira ne’e mak halo komunikasaun ba malu durante fasilita no lori ita-nia timoroan mesak feto hotu hamutuk na’in-7 ba servisu iha nasaun Emirados Árabes Unidos (Abudabi) dadaun ne’e sira sai vítima hela iha estrajeiru”, informa Adino.

Ba vítima sira dadaun ne’e PSIK halo ona komunikasaun liuhusi NCV Interpol Dili ho ECV Abudabi (Emirados Árabes Unidos) atu tau matan ba vítima sira iha estranjeiru.

“Ida ha’u hatete ba ita-boot sira iha indikasaun ba ajensia ne’ebé ita suspeita husi nasaun Indonézia envolve hotu iha krime tráfiku umanu ida-ne’e, ita liuhusi intepol komunika ona ho NCV iha Jakarta para sira bele halo atuasaun ruma ba autór sira iha Jakarta”, afirma nia.

Maibé kona-ba ajensia sira ne’ebé dadaun ne’e komete krime tráfiku umanu rejistu duni ka la’e ida-ne’e segredu ba justisa mak sei ko’alia.

“Maibé ha’u ko’alia ba imi ajensia iha Timor ne’e dahuluk sira halo rekrutamentu halo kursu ba joven sira ho lian-Inglés, ikus mai iha kotuk halo komete kazu tráfiku umanu lori Timorona sira ba nasaun liur, tanba vítima sira-nia destinasaun ne’ebé agora ita hatene ona mak iha feto na’in-7 mak vitima iha ema nia rai”, esplika nia.

Alende iha mós informasaun adisionál balun ne’ebé dadaun nee PSIK simu tan katak, iha joven mane timoroan na’in-tolu mós dadaun ne’e sai vítima ba ajensia ne’e hodi fasilita no lori sira ilegalmente tama ba nasaun Malázia.

“Kazu joven mane na’in-tolu ne’e ita sei buka tuir, informasaun sei adisionál hela, ita sei buka tuir atu hatene, maibé sira vítima hotu ba ajensia ida agora iha halo ona mandadu detensaun ba suspeitu na’in-tolu no buska ba sira-nia hela fatin”, esklarese nia.

Tanba ne’e vítima feto na’in-7, dadaun ne’e iha nasaun Emirados Árabes Unidos nia, maibé esforsu hodi deporta hikas sira mai Timor-Leste kompeténsia Governu no Estadu Timor-Leste mak bele halo komunikasuan.

“Ami-nia parte mak halo komunikasuan ho Interpol sira atubele asegura sira, maibé kona-ba desporta fila sira mai ne’e Estadu ho Estadu mak bele rezolve liuhusi Governu hanesan MNEK sira-nia diplomata sira atu komunika ho Governu Emirados Árabes Unidos (Abudabi) para bele lori fila sira mai Timor-Leste”, dehan nia.

Tanba ne’e ba oin iha tan vítima seluk ho kazu hanesan ne’e sei iha ka la’e ida-ne’e segredu ba justisa mak sei haree, bainhira iha tan Ministériu Públiku fó orden ho mandadu PSIK hanesan ezekutadór prontu halo servisu, tanba kazu ne’e akontese iha fulan-abril tinan 2022. (*)