Tempotimor (Dili)-Xefe Investigadór Polísia Sientífiku Investigasaun Kriminál (PSIK), Octavio da Costa Araújo hatete, iha loron seguunda (25/07) ohin dader, konsege kaptura sidadaun Timoroan ida ho inisiál MG ne’ebé deskonfia lori osan falsu ho montante rihun-$62 mai iha Timor-Leste (TL).
“Osan ho tahan $100.00 ne’ebé mak Suspeitu lori hamutuk tahan 62 no dadaun ne’e ita identifika ona tahan 17, no restu kolega sira espesialista ba dokumentu ka moedas falsu sira mak sei kontinua halo ezaminasaun ba osan restu ne’ebé mak iha Suspeitu nia liman”, dehan nia liuhisi Konferensia Imprensa iha PSIK, Kaikoli, segunda (25/07).
PSIK ne’ebé kaptura sidadaun Timoroan ne’e iha Banku Sentrál Timor-Leste oras tuku 9:300 otl.
“Atu informa ba ita-boot sira no ba públiku katak, ohin (25/07) purvolta 9:30 dadersan ita-nia ekipa servisu pikete prevensaun PSIK nian halo detensaun enfragrante delitu ba ita-nia sidadaun ida ho inisiál MG iha área Banku Sentrál, katak Suspeitu refere foin fila husi Inglaterra iha loron 21 fulan ida ne’e, suspeitu refere ita halo detensaun enfragrante delitu ba nia tanba suspeitu refere halo pasajen ba osan falsu ho valór osan $100.00”, dehan nia.
Antes PSIK identifika Suspeitu MG utiliza ona osan sira ne’e hodi hola nia motorizada.
“Hanesan medida preventiva hafoin ita halo identifikasaun ba Suspeitu ita identifika fatin balun ne’ebé mak Suspeitu halo ona sirkulasaun uza osan iha fatin refere, ita konsege ba ona iha parte balun ne’ebé Suspeitu ba loja balun ne’ebé mak ba maibé osan refere nia paradeiru agora iha Banku”, dehan nia.
Suspeitu MG dadaun ne’e PSIK detein durante oras 72 hafoin prosesa tuir lei justisa nian iha Timor-Leste. (*)