Deputada Bankada CNRT, Carmelita Caetano Monis hatete, tuir loloos kazu ne'e tenke investiga ona tanba hahú husi tinan 2014 to'o 2022, Governu gasta ona osan liu millaun US$20 ba projetu refere.

"Ha’u lahatene KAK halo investigasaun ba ida ne'e ka la'e, laiha ida. Kamara de kontas mós la tau dehan atu halo prosesu ba ida ne'e, laiha", dehan nia iha PN, kinta (06/01).

Daduk kamara de kontas rasik haruka ona relatóriu ezekusaun ba Ministériu Públiku, ba Prokuradória Jerál Repúblika, Parlamentu Nasionál no ba Governu, maibé laiha levantamentu no investigasaun ruma ba kazu Ró Haksolok.

"Parlamentu mak debate hela hanesan ne'e mais ema hothotu dukur no toba hela", afirma nia.

Akademista UNTL, Camílio Ximenes Almeida, sujere ba KAK tenke investiga, tanba lei ne'e tenke vale ba ema hotu.

"Se la’e ema dehan lei ne'e ba ema boot sira laiha, so ba de'it ema ki’ik oan sira", afirma nia.

Parte akademista mós haree katak, durante ne'e KAK halo de'it mak kapturasaun no investigasaun ba Diretór no Xefe Departamentu sira ne'ebé mak lori karreta Estadu nia iha loron sábadu no domingu, maibé ba kazu Ró Haksolok, KAK tur nonok de'it la ko’alia buat ida.

"Ha’u dezafia señor Sergio, uluk nia ko’alia iha kotuk-kotuk, mais agora lakon totál ne'e. Ne'e labele, tanba povu nia osan, ema hotu luta ba rai maubere no ema hotu tenke justifika ba situasaun ida ne'e", dehan nia.

Tanba ne'e siknifika ema balun halimar iha partidu ida nia laran ak hetan poder politika atu goza rekursu sira ne'ebé mak iha, no halo dezenvolvimentu labele la'o, laiha kampu traballu ba ema.

"Iha notísia ida ne'ebé mak ha’u akompaña, señor Rogerio mai tiha ona mak foin señor Rogerio rasik ko’alia mak agora buat ne’e hebo oituan, maibé uluk kuandu ha’u koalia ema barak tolok hau”, haktuir nia.

Purtantu ba kazu lgreja Katólika mós bele tama hotu iha laran tanba iha momentu ne'e iha madre balun ne'ebé mak dehan aman sarani no iha amu bispu rasik mós dehan aman sarani ne'ebé dehan ró ne'e atu mai maibé realidade la akontese.

"Amu Bispu Bazilio dehan karik ne'e bosok kompletu, tanba ró la mai mak ita dehan fali ró mai", hatete nia. (*)