Ofisiál Programa Promosaun Edukasaun Saúde Munisípiu Baukau, Abrão Pinto hatete, vasina ba estudante sira hala'o ona orientasaun advokasia ba profesionál saúde sira no kontinua iha nivél Munisípiu to'o Postu Administrativu.

Advokasia ba eskola sira durante fulan-marsu nia laran, atu hatene efeitu no vantajem husi vasina Pfizer inklui mós rekolla dadus kada eskola hafoin parte saúde koloka membru sira fó vasina ba estudante.

"Durante ita la'o dadauk ona, ba labarik idade-12 to'o menus 18 anus ne'e, hamutuk na'in-13 mak ita vasina ona, ami implementa kona-ba Booster mak inan aman sira lori mai ami implementa dadauk ona, iha na'in-2 horseik mai tán berarti (signifika) hamutuk 15 pesoas mak ita vasina," dehan Abrão iha kna'ar fatin Reamare, kinta (24/02).

Tanba ne'e, pesoál saúde sira nafatin pasa informasaun ba labarik estudante sira husi tinan-12 to'o tinan-18 bele hakbesik aan iha sentru saúde reamare hodi simu vasina.

Tuir dadus estudante ne'ebé atu simu vasina Pfizer husi eskola 184 iha Munisípiu Baukau ho nia hamutuk rihun 21-resin.

Alende vasina Pfizer ba estudante sira, sidadaun liña frente iha Munisípiu Baukau ne'ebé simu ona vasina Booster hamutuk na'in-602.

"Totál lolos, liña frente iha Baukau ita hahú vasina 2018 pesoais, maibé kontinua vasina kuaze ema rihun 4 resin," nia haktuir

Vasina Pfizer iha Munisípiu Baukau dadaun iha viál 200, tanba ne'e disponivél ba sidadaun ne'ebé simu ona vasina AstraZeneka doze kompletu iha posibilidade fó kontinua vasina Booster ba sira.

Enkuantu sidadaun ne'eb’e simu ona vasina AstraZeneka doze primeiru pursentu ho 85, doze segundu pursentu 72, sidadaun ne'ebé seidauk simu vasina hamutuk 9,312. (*)