Dom Norberto ne’ebé tama iha ICU, tanba hetan ataksaun moras tensaun, bainhira hala'o viajen husi Dioseze Maliana mai Dili iha loron domingu (27/02).
Tanba ne’e, Xanana Gusmão ho Ramos Horta ne’ebé hetan akompaña husi ekipa deside halo vizita urijente ba Dom Norberto, ne’ebé sei baixa hela iha HNGV.
Diretór HNGV, Marcelino Correia hatete, ho kondissun moras ne'ebé Dom Norberto enfrenta dadauk filafali ona ba normalizasaun tanba hetan tratamentu di'ak husi médiku sira iha ICU.
“Loos duni ita-nia Amu Bispu Maliana ne'ebé mak nia mai horikalan (27/2) husi Maliana mai, depois iha dalan nia hetan problema atakasaun ho nia tensaun ne'ebé mak sa'e maka’as (190 ital), ne'ebé mak afeta ba nia, halo nia artikulasaun ne'ebé mak hanesan ko'alia halo ibun toos, nia impaktu husi ne'ebá”, informa nia iha HNGV, segunda (28/02).
Hafoin to'o iha ospitál, deretamente lori ba Baixa iha Unidade de Intensivu iha ICU, no médiku sira halo kedan atendimentu, dadaun nia kondisaun estavál filafali, no nia ibun ne’ebé ko’alia to’o narmal fila fali.
Antes ne’e, Dom Norberto mós sofre moras fuan (Coração), no lori ba tratamentu iha estrajeiru hodi tau kadeli, ne'ebé ida ne'e mak situasaun moras ne'ebé durante ne'e nia enfrenta.
Ho ida ne'e, Dom Norberto Amaral dadaun ne'e sei baixa hela iha sala ICU maibé nia kondisaun rekupera filafali ona no agora hein de'it atu haree rezultadu teste rán no rezultadu subscand ne'ebé mak dadauk iha hela prosesu.
“Ida ne'e nia mai Dili ha’u ladún hatene, maibé parese nia atu mai tuir enkontru episkopál, tanba nia mai ospitál ne'e, nia ho karreta privadu ne'e, ne'ebé parese mai iha dalan mak akontese buat ne'e”, hatete nia. (*)