"Ohin ita lansamentu ofisiál vasina iha Munísipiu Baukau ba oan sira husi 12 to'o 17 anos, ita lansamentu mós ba iha vanisa booster ba hirak ne'ebé kompletu vasina primeiru no segundu,"dehan Diretór Nasionál apoiu servisu Ospitál MS, Nilton da Silva, iha eskola EBC Tirilolo Baukau, sesta (11/03).

Bainhira Timor-Leste hasoru pandemia surtu covid-19, ne’ebé númeru pozitivu sa'e makas, maibé liuhusi vasina fó duni imunidade di'ak ba komunidade nia saúde hodi reduz kazu covid-19.

Tanba ne'e, MS kontinua esforsu ba estudante ne'ebé tinan-12 to'o 17 bele hola parte iha vasina hodi aumenta imunidade.

"Ékipa advokasia (saúde) servisu hamutuk ho edukasaun fó advokasia ba mestri sira, ba alunus rasik no mós ba inan aman bele lori oan sira ba iha vasina," nia hatete

Nune'e, Diretór Servisu Edukasaun Munisípiu Baukau, Augusto Ornai Ximenes, hatete, tuir tarjetu estudante ne'ebé atu simu vanisa Pfizer iha Munísipiu Baukau hamutuk 21,802.

Mekanismu MS kopera ho Ministéiru Edukasaun Juventude no Desportu (MEJD) lansa ofisiál vasina Pfizer husi nivél eskola, atu hafasil servisu pesoal saúde nian hodi fó vasina ba labarik idade-12 to'o 17 husi eskola 214 iha Munísipiu Baukau.

"Ita nia eskola iha Baukau hamutuk 243, maibé pré-eskolar 30, katak 214 eskola ne'ebé ékipa saúde sira sei kobre fó vasina ba labarik ho idade-12 ba leten," nia informa

Estudante Armenejiclota ho tinan-14, hatete, hafoin simu tiha vasina, pesoal saúde sira fó hanoin, tenke deskansa liu minutu-30 resin.

"Ha'u simu vasina hakarak prevene aan husi covid-19," nia afirma

Enkuantu vasina Pfizer Booster ne'ebé lansa iha eskola ensiñu báziku sentral Tirilolo estudante hamutuk na'in-458 mak hahú simu ona doze dahuluk, no mestri sira ne’ebé kompleta ona vasina AstraZekena kontinua simu vasina booster hamutuk na'in-51.

Entertantu lansamentu iha vasina ne'e ho viál-100, viál-ida ba ema na'in-6, no ba estudante ne'ebé atu kontinua ba simu doze segundu hafoin remata durante loron-21 nia laran. (*)