Tuir informasaun ne’ebé www.tempotimor.com asesu iha pájina Palásiu Sinza, segunda (04/07) katak, Ministra Saúde Odete informa, Ministériu Saúde la taka dalan ba aldeia ida atu hetan postu saúde, maibé presiza preense kritéria atu hari’i postu saúde iha nível aldeia.

Ministra Odete deklara kestaun ne’e, bainhira hataan preokupasaun Xefe Aldeia Tasmil nomós Juventude husi Suku Lontas wainhira partisípa iha Dialógu Komunitária iha Ámbitu Programa Governu iha Povu nia Leet ‘Naroman ba Suku’ iha Suku Lontas, Postu Lolotoe, Munisípiu Bobonaro, sesta (01/07).

Ministra esplika, Postu Saúde ne'e hari’i de'it iha suku, bele mós iha aldeia maibé iha rekezitu presiza kompleta.

“Iha aldeia ita bele hari’i postu saúde, maibé iha kritéria atu hari’i postu ida iha aldeia ka fatin ne'ebé mak komunidade hela ba konsidera izoladu tebetebes, sira difísil atu asesu ba postu saúde ka fasilidade saúde ne'ebé besik, wainhira iha tempu udan no kondisaun jeográfika ne'ebé la'o-ain liuhusi oras rua nia laran maka Governu bele konsidera para hari’i postu saúde.

Maibé iha ninia kritéria mak presiza haree mós númeru populasaun ne’ebé hela iha Aldeia ka suku ne’ebé Governu atu hari’i Postu Saúde iha mínimu populasaun atuslima.

“Kritéria ida seluk maka númeru populasaun, Governu sei la loke postu saúde ida ho númeru populasaun ne'ebé mak ki’ik, só bele loke wainhira númeru populasaun mínimu atus lima ba leten”, katak nia.

Preokupasaun hirak ne'e Ministra saúde rejista no sei kria hikas ekipa ida hamutuk ho Diretór Serbisu Saúde Bobonaro nomós administrasaun Munisípiu Bobonaro atu halo levantamentu iha terenu.

“Ha'u sei kria ekipa ida mai iha fatin ida-ne'e, postu administrativu Lolotoe, hamutuk ho autoridade munisipál Bobonaro atu halo uluk levantamentu ida ba fatin tolu ne'ebé mak xefe aldeia sira rekomenda hela. Ha'u rasik ohin haree ona katak katak fatin ida-ne'e merese duni atu hetan postu saúde. Se la hari’i postu saúde karik ita bele estabele de'it postu tratamentu. Fasilidade saúde atu fasilita populasaun sira labele la'o dook, atu tulun inan isin-rua sira no inan aman sira iha ne'e atu asesu ba saúde”, haktenik nia.

Dadaun ne'e, postu saúde hamutuk 300-resin iha nível suku iha territóriu laran tomak, nune'e Governu presiza atu hari’i tan postu saúde foun hamutuk 125.

“Postu saúde sei mai ho pakote ida ho kompozisaun mak rekursu umanu hanesan médiku, parteira, ernfermiru, farmasiata no laboratóriu. Infelizmente ita seidauk prense pakote hirak ne'e tanba ita sei menus iha rekursu profisionál. Ministériu Saúde nafatin tau iha prioridade ba asuntu ida-ne'e”, dehan Ministra.

Ministra mós apela ba líder komunitária sira atu akompaña didi'ak programa Bolsa da Mãe ne’ebé hahú lansa ona hodi insentiva inan isin-rua viziita bebeik fasilidade saúde to’o bebé moris.

“Programa Bolsa da Mãe ida-ne'e ministériu saúde serbisu hamutuk ho ministériu solidaridade sosiál no inkluizaun. Ho insentiva ne'ebé Governu fó liuhusi programa ne'e atu inan isin-rua sira bebeik vizita fasilidade saúde atu pesoál saúde sira halo akompañamentu to'o bebé moris. Pesoál saúde sira bele identifika inan ka labarik sira-nia kondisaun, se karik kategoriza ba mánutrisaun entaun ita-nia pesoál saúde sira halo kedas intervensaun”, hatete nia. (*)