Tuir informasaun ne’ebé www.tempotimor.com asesu iha pájina Palásiu Sinzas, segunda (25/07) katak, Ministra Saúde Odete hatete, ofisialmente fatin jinástiku ne'e sei loke ba públiku hodi halo jinástiku tanba jinástiku nu'udar parte ida atu ajuda ema hotu nia saúde sai saudável liután karik bele hapara fuma.
“Ita agradese nafatin tanba fatin ida-ne'e la'ós halo jinástiku de'it maibé wainhira ita halo jinástiku ita mós hanoin ona katak iha buat balu ne'ebé mak ita koko atu bandu nafatin, ita halo jinástiku maibé ita fuma nafatin, ita halo jinástiku bele hemu tua maibé tenke kontrola, pelumenus kolu oan ida labele kaixa ida, ida-ne'e lalos ona entaun sigaru ha'u hanoin para di'ak liután atu nune'e ita-nia jinástiku ne'ebé mak ita halo ne'e sai efetivu liután”, dehan Ministra Odete.
Tanba ne’e, agradese ba Organizasaun Mundiál Saúde ne'ebé ajuda hodi kria fatin jinastiku hodi bele oferese ba komunidade sira iha Ainaro atubele utiliza.
“Ha'u haree katak fatin ne'e di'ak, ita espera katak iha tan fatin seluk hanesan iha espasu seluk ne'ebé mak iha maibé provizóriumente ida-ne'e ita simu husi Organizasaun Mundiál Saúde ne'ebé mak tau matan ba ita-nia saúde, husu ita atubele la'ós fatin ida-ne'e de'it mak jinástiku maibé ita mós iha dalan seluk halo jinástiku, iha desportu lubuk ida, modalidade oinoin ne'ebé mak iha ona, imi hatene hala'o atividade sira ne'e, ezemplu halai atu nune'e ita nafatin iha kondisaun saúde ne'ebé mak di'ak”, haktenik Ministra.
Partisípa iha lansamentu mak reprezentante OMS, Administradór Munisípiu, Padre, Diretór Jéral na’in-2, Diretór Nasionál no Diretór HR, Diretór SSM, PNTL, F-FDTL no seluk tan. (*)