Portavoz SIJK Odete da Silva Viegas hatete, dezde Janeiru to'o 27 Abril tinan ne'e, TL rejista ona númeru kazu dengue hamutuk rihun ida resin.
Tuir Odete, aleinde hato'o kona-ba informasaun Covid-19 nian, SIJK mós hakarak hato'o informasaun kona-ba moras dengue ne'ebé konsidera fó ameasa ba saúde publika.
"Kazu dengue husi Janeiru to'o 27 Abril hamutuk 1.050, husi munisípiu Dili hamutuk 628, Ermera hamutuk 293 no restu iha munisipiu seluk," dehan Odete iha sala situasaun, Sentru Konvensaun Dili, Tersa (28/04).
Tuir dadus ne'ebé SIJK simu, kazu dengue mosu kuaze iha munisipiu hotu-hotu, maske nune'e to'o ohin loron menus Rejiaun Autonomu Oekusse no Munisipiu Vikeke mak seidauk relata informasaun kona-ba kazu dengue.
Entretantu, husi númeru kazu rihun ida resin ne'e, Odete dehan, iha na'in 8 mak mate tanba sofre moras dengue.
"Ema na'in ualu mak mate ona ba kazu dengue, husi na'in ualu ne'e husi Dili na'in 6, Baukau ida, no Kovalima mós ida," dehan atual Diretora Jerál Prestasaun Saúde (DJPS) Ministériu Saúde ne'e.
Odete esplika, dengue mai husi susuk ho naran aedes aegypti ne'ebé moris iha nasaun sira ho temporada rua, bailoron no udan, hanesan Timor-Leste.
Sinal ba ema sira ne'ebé hetan ona dengue, nia esplika, mak isin-manas maka'as durante loron haat to’o hitu, ulun moras maka'as, sente moras iha parte haleu matan nian (retro-orbitral), isin no ruin moras maka'as, laran-sa’e no muta, diarea (tee-been), no mosu musan-musan ho kór mean (ruam, erupção cutânea) iha kulit.
Bainhira iha sinais no sintomas hirak ne'e, Odete husu atu ba lalais sentru saúde ka ospital ne'ebé besik liu hodi bele hetan tratamentu.
"Sinal no sintoma sira moras dengue iha tipu rua: ida, dengue isin-manas no dengue isin-manas to'o raan sai husi inus, matan, muta raan, no kauza ita isin lakon liquidos barak ne'ebé lori ema ida tama ba kondisaun ida ne'ebé grave ho fallu multiorgaun," nia dehan.
Dala-barak, tuir nia, kauza ne'ebé halo ema ne'ebé moras dengue mate mak isin-manas no ho raan tanba dengue tipu ida ne’e iha posibilidade boot atu lori ema ida ba kondisaun dengue shock síndrome.
