Dala Ida tan, TL Livre husi Covid-19 Featured

Koordenadóra Jerál Servisu Covid-19 iha Ministériu Saúde (MS), Odete Viegas koalia hela ba média sira iha Palásiu Sinzas Kaikoli, segunda (21/09). Koordenadóra Jerál Servisu Covid-19 iha Ministériu Saúde (MS), Odete Viegas koalia hela ba média sira iha Palásiu Sinzas Kaikoli, segunda (21/09). Foto Tempo Timor

Tempotimor (Dili)-Diresaun Jerál Servisu Covid-19, Ministériu Saúde informa katak, pasiente Covid-19 na’in ida ne’ebé durante ne’e baixa iha Sentru Izolamentu Vera Kruz rekuperadu ona. Ho nune’e, Timor-Leste dala ida tan deklara livre husi Covid-19.

Koordenadora Jerál Servisu Covid-19, MS, Odete Viegas hatete, iha 21 Setembru 2020, pasiente ikus ne’ebé halo tratamentu iha Vera Kruz livre ona husi Covid-19.

"Aproveita mós oportunidade ida ne'e hakarak atu hato'o ba públiku katak ita-nia pasiente ida ne'ebé dadaun ne'e baixa hela iha izolamentu, ohin (Segunda) konfirmadu negative,” dehan nia liu husi konferensia imprensa iha edifisiu MS, Palásiu Sinzas, Kaikoli, Segunda (21/09).

Pasiente refere, nia hatete halo ona teste dala rua tutuir malu no rezultadu hatudu katak nia negativu.

“Teste ba dahuluk realiza iha loron 15 fulan Setembru, no ikus iha 18 Setembru, no ohin ita bele hatete ona ba públiku ema ne'e rekuperadu, no pasiente ne'e sei fó fali ba nia fatin,” dehan nia.

Ho númeru rekuperadu ne’e, nia dehan, total pasiente Covid-19 ne’ebé rekuperadu hamutuk na’in 27.

Entretantu, Koordenadora ne’e mós informa, total pasiente ne'ebé hala’o ona teste hamutuk na’in 6.718, rezultadu negativu na’in 6.531, no na'in 160 mak sei hein rezultadu.

Kona-ba sira ne’ebé kumpre hela kuarentena hamutuk na’in 609, kompostu husi Dili na’in 490, no iha munisípiu seluk na’in 119.

Ba auto-kuarentena, nia hatete, so uniku iha Dili mak ema na’in 88 halo auto-kuarentena.

“Sira ne'ebé pasa ona kuarentena durante loron 14 to'o ohin, hamutuk na’in 4.228, husi Díli nian hamutuk ema 3.553, no mós iha munisípiu hamutuk ema 675,” nia informa.

Husi ema hirak ne’ebé tama iha kuarentena, iha na’in 298 mak tama mai TL liu husi dalan illegal.

Maske TL livre ona husi Covid-19, maibé Odete fó hanoin nafatin katak ameasa husi pandemia Covid-19 seidauk hotu.

Tan ne’e husu ba Timor-oan hotu-hotu atu prevene an husi moras ida ne'e.

“Atu fó hanoin nafatin ba públiku katak saúde importante nune'e ita idaidak mak sei responsábiliza ba ita-nia saúde, tanba ne'e husu ba komunidade no líder komunitáriu sira atu nafatin fó atensaun ba moras ida ne'e,” nia husu.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.