Maske esforsu lubun durante ne’e estadu halo hodi prevene moras Covid-19 konsege salva duni sidadaun barak nia moris husi moras ne’ebé nasaun sira iha mundu hotu tauk.
Ho kazu dahuluk ba Covid-19 hamate sidadaun ida sai istoria foun ba Timor-Leste no mundu iha tinan 2021, tanba pandemia Covid-19 mosu iha fulan-dezembru tinan 2019 konsege hamate sidadaun Xina barak no tama iha tinan 2020 hamate mós populasaun sira iha nasaun Estadu Unidu Amerika, Bazil, Índia, Itália, Rússia, Reiunu Unidu, Portugal, Indonézia inklui mós nasaun sira seluk iha sudete Áfrika, Europa, Amerika, Austrália no Azia.
Tuir dadus ne’ebé fó sai husi worldometers info coronavirus hatudu katak kazu pozitivu to’o loron 6 fulan-abril hamutuk 132,402,668, iha mate 2,873,247 no kazu rekooperadu hamutuk 106,685,560. Husi dadus ne’e rasik sei update kada loron.
Koordenadór pilar hitu, Nilton do Carmo da Silva, fó sai iha dadersan pur-volta 07:10 otl Timor rejista kazu mate ida ba Covid-19.
“Ohin loron 6 fulan-abril dadersan pur-volta 07:10 otl ita Timor-Leste rejista kazu mate ida ba Covid-19”, dehan Nilton iha Ospital Lahane Dili, tersa (06/04).
Matebian sexo Feto ho idade 44, SIJK hahú deteta covid iha loron 24 fulan-marsu, bainhira teste ka suap iha loron 23 fulan-marsu depois lori ba izolamentu Tasitolu.
Durante iha fatin izolamentu, pesoál saúde halo observasaun nomós atende, iha loron loron 4 fulan-abril komesa mosu sintomas, nune'e pesoál saúde sira halo observasaun no fó atendimentu tuir kazu ne'ebé sei lizeiru.
Maibé tuir observasaun pesoál saúde iha Tasitolu laiha mundansa no iha loron segunda (05/04) dader halo transferensia iha izolamentu kazu grave nian (Vera cruz) maibe tamba Inundasaun provizóriumente transfere kedan ba Ospital Lahane no ohi dader hakotu iis.
Dadaun ne'e parte SIJK hahú perpara hodi transfere ba Ministeiru Soridaridade Sosial no Inkluzaun (MSSI) no Ministériu Admistrasaun Estatal (MAE) antes ba halot iha simteiru Covid-19 iha Metinaro.
Maske, tinan ida liu covid-19 alastra iha mundu to’o mai iha Timor-Leste no afeita ona komunidade kuaze atus 7 liu konta husi 2020. Ba dahuluk Estadu halo servisu barak hodi satan númeru mate maibé iha tinan 2021 mate iha ona ida.
Kalamidade surtu covid-19 no afeita maka’as liután kalamidade Inundasaun ne’ebé hamate ona povu na’in 20 resin balu seidauk hetan no número vitima kuaze rihun-sanulu-resin.
Ho númeru mate nai’n ida mai fó hanoin malu ho konsiénsia atu labele halibur malu barak liután, uza nafatin máskra no fase liman ka desinfekta.
Maske situasaun inundasaun halo povu sofre no evakua povu atus ba atus iha fatin sira hanesan Dom Bosco-Komoro, Madre Balide, CVTL, Ministériu Finansas no Madre iha Hera no fatin seluk maibé, maibé fó hanoin ba malu hodi uza Máskra nafatinno fase liman.
Tanba ne’e, ekipa professional Saúde hasai nafatin swab ba fatin refujia temi iha leten. Maske situasaun ne’e sei enfrenta difikuldade oioin.(*)
