Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, evolusaun surtu Covid-19 iha Munisípiu Díli tuir klasifikasaun Organizasaun Mundial Saúde (OMS) ne’ebé tama ho cluster dadaun ne’e tama ona transmisaun Komunitáriu.
“Evolusaun surtu Covid-19 iha Munisípiu Díli hahú Husi loron 21 fulan-marsu tinan 2020 to’o loron 25 fulan-abril 2021, totál komulativu 1612 no kazu foun iha oras 24 nia laran hamutuk 70, mate na’in-3. Tuir klasifikasaun OMS transmisaun Komunitáriu”, informa Rui liuhusi Zoom Conference, domingu (25/04).
Nune’e evolusaun surtu Covid-19 iha Munisípiu Manufahi totál komulativu 51, kazu foun iha oras 24 nia laran 12. Vikeke kazu 13, Covalima kazu 52, Ermera kazu 41 no Munisípiu Baukau kazu 56, kazu foun oras 24 nia laran ida. Husi Munisípiu hirak ne’e tama iha klasifikasaun cluster.
Aliende ne’e, Munisípiu Lautein rejista kazu komulativu ho totál 12, kazu foun iha oras 24 nia laran 5. Iha Munisípiu Aileu kazu 5 no iha oras 24 nian laran kazu ida, husi Munisípiu rua ne’e klasifikasaun kazu esporadiku.
Entretantu, RAEOA totál komulativu kazu 5, Munisípiu Ainaro 15, Bobonaro 16, Likisá 14, Manatuto 5, maibé husi Munisípiu hirak ne’e iha oras 24 nia laran la rejista kazu foun, no klasifikasaun kazu esporadiku. (*)