Milagre ne'ebé mosu derepente de'it ba sidadaun Ataúro na'in-7 ne'ebé halo viajen husi Dili ba Ataúru iha loron sabadu (15/05) derepente mout iha tasi klaran, maibé iha nai'n-3 ne'ebé hetan salva husi manu mutin konsege to’o iha rai maran ho kondisaun moris, maske iha na’in-haat mak seidauk hetan.
Ho esforsu ne’ebé Peskadór Ataúro iha hodi deside buka tuir vítima na’in-haat mak seidauk hetan, maibé iha loron segunda (17/05) Peskadór konsege hetan matebian RsM nia mate isin iha área Kristu Rei.
Husi Peskadór Ataúru, Mariano da Cruz, konta tuir iha tuku 06:00 otl, sira hahú buka iha diresaun ba Likisá no Ataúru nian, nune'e sira to'o iha Kristu Rei hetan uluk Ai-kabelak hafoin hakbesik hodi hetan mate isin RsM.
"Ami hetan ai-kabelak husi ró ne'ebé tula sira, entaun lakleur ami hetan ona mate isin ne'e, ami hetan iha tuku 9:35 otl", dehan nia iha Unidade Polísia Marítima (UPM) Lesidere, segunda (17/05)
Ho akontesementu ida ne'e sira hakarak partisipa diretamente hodi buka tuir, nune'e iha loron domingu (16/05) kedas sira sai ba diresaun Manatuto nian depois to'o Metinaro sira filafali ba Ataúru.
"Tuku 3 loraik ami kontinua sai fali husi Ataúru no sira deskansa uituan, nune'e tuku 6 dader sira hahú buka no tuku 9:35 sira konsege hetan mate isin”, informa nia.
Wainhira hetan tia mate isin ne'e sira kontaktu direta ba Unidade Polísia Marítima (UPM) no membru UPM tun direta ba Kristu Rei lori tula mate isin mai iha fatin UMP no oras ne'e mate isin evakua ona ba iha mortuariu Hospital Nasionál Guido Valadares (HNGV).
Peskadór ne’ebé hetan mate isin hamutuk ema na'in-8 husi Ataúru ho ró Heuk-Meta no agora sira hamutuk ho UPM kontinua ba buka tuir vítima na'in-3 ne'ebé seidauk hetan.(*)