"Iha ne'e ha'u triste tebtebes, husi inísiu fulan-juñu kedas to'o jullu ne’e, médiku ne'ebé destaka iha ne'e, sira husik mamuk postu ne'e, hodi la atende komunidade nia moras, e ha’u-nia komunidade sira sente araska tebes, ou atu asesu ba saúde”, dehan Luciano Makarun Cárceres, iha nia rezidénsia aldeia Hatukonan, Suku Lakumesak, Postu Administrativu Laklo, Munisípiu Manatutu, domingu (18/07).

Postu Saúde Hatukonan iha kondisaun infraestrutura ne'ebe di'ak, no kompleta ho fasilidade sira atu fasilita pesoál saúde sira hodi fó atendimentu ba komunidade, maibé to'o oras ne'e abandonadu.

"Postu Saúde Hatukonan, iha kondisaun ne'ebé di'ak, maibé médiku sira laiha interese atu servisu iha ne'e. Ne'ebé ha’u nu'udár Xefe Aldeia, la'ós ha'u kesar, maibé tuir ha'u haree ho matan, ha'u labele taka, e ha’u tenke husu tuir nafatin katak, tanba saida mak postu saúde ne'e husik mamuk hodi la fó asesu saúde ba ha’u-nia komunidade sira”, dehan nia.

Antes ne’e, Xefe Sentru Saúde Postu Laklo mós promete ona ba konunidade sira katak, iha tempu badak sei koloka fali médiku ida ba postu saúde ne'e, maibé to'o oras ne'e, postu kontinua husik mamuk.

"Ha'u rona, sira atu koloka duni parteira foun ida atu mai. Maibé, sira hatete de'it, atu realiza fali hanoin ida ne'e, seidauk nafatin. Ha'u rona hela até agora, la koloka. Entaun, ida ne'e ha'u-nia komunidade sira atu ba fali konsulta iha Laklo Villa mós labele, tanba distánsia dook", hatete nia.

Tanba ne'e, rekomenda ba Xefe Sentru Saúde Postu Administrativu Laklo, no Munisípiu Manatutu nian, atu kria fali mekanizmu oinsá bele destaka médiku ida ka rua hodi halo servisu atendimentu komunidade sira iha Aldeia Hatukonan.

Enkuantu, Postu Saúde Hatukonan, fasilita mós komunidade sira husi Aldeia Bua ho Reabutogeon, hodi halo tratamentu ba saúde, tanba komunidade hirak hela kuaze distánsia besik malu.

Tanba Planu Estratéjia Dezenvolvimentu Nasional (PEDN) iha setór saúde nian katak, entre tinan 2011 to'o 2030 kada Postu Saúde sira sei kompleta ho pesoál saúde hamutuk na'in-lima, partera 1, Médiku 1,  emfermeiru 2, ho doutór espesialísta ida, hodi halo atendimentu saúde ba komunidade sira.

 Maibé kona-ba kondisaun estrada ne'ebé kontinua aat ba bebeik, besik tinan 21 ona, tanba estadu rasik laiha polítika klaru atu povu sai husi kiak ho nakukun laran hodi fasilita dezenvolvimentu bázika.

Aldeia Hatukonan, kompostu husi Uma-kain 137 ho populasaun hamutuk 240, mane na'in-213, feto na'in-207, lokaliza iha Suku Lakumesak, Postu Administrativu Laklo, Munisípiu Manatutu. (*)