"Ita hotu hatene katak, estratéjia nasionál ba nutrisaun primeiru dezenvolve iha 2004, hafoin mós ita dezenvolve tan estratéjia hanesan ba períodu 2014 to’o 2019. Iha estratéjia rua ne'e, ita kobre asuntu hotu liga ba nutrisaun husi setór sira hothotu, hanesan husi parte saúde nian, agrikultura, obras públika, edukasaun, no selseluk tan. Esforsu lubuk ida mak ita hala’o ona, maibé presiza atu hadi’ak liután”, dehan Ministra Saúde (MS), Odete Maria Freitas Belo, durante intervensaun iha atividade workshop konaba nutrisaun iha salaun São José, Katedrál, Bebora, kinta (12/08).
Iha workshop ne'e, envolve direta husi parseiru dezenvolvimentu sira mak hanesan UNICEF, Uniaun Europeia, Ajénsia sira Nasaun Unida nian, NGO Nasionál ho Internasionál, hamutuk Ministériu Saúde hodi halo konsultasaun kona-ba planu estratéjia nasionál ba nutrisaun iha setór saúde nian, husi tinan 2021 to'o 2025.
"Haree ba nível ne'ebé sei aas husi prevalénsia má nutrisaun, iha ita-nia rain, taxa mortalidade ne'ebé kontinua aas, taxa susu-been nian ne'ebé hahú tun, no prátika fó hahán ba bebé no labarik ki’ik ne'ebé mak seidaun optimu no selseluk tan”, hatete Odete.
Nune'e, iha tinan 2019, MS ho apoia finanseira no téknika husi Uniaun Europeia no UNICEF, iha inisiativa atu halo revizaun ba estratéjia atual hodi bele planeia fali ba dezenvolvimentu estratéjia foun ba periudu 2021 to'o 2025 nian hodi haree ba setór saúde.
"Prosesu dezenvolvimentu estratéjia foun ida ne'e, komesa husi hala'o revizaun ba estratéjia anterior. Rezultadu husi revizaun ne'e mak sai hanesan matadalan hodi dezenvolve fali estratéjia nutrisaun setór saúde nian”, nia esplika.
Tanba ne'e, planu estratetéjia husi tinan 2021 to’o 2025 sei oferese oportunidade ida hodi gia esforsu pragmátiku sira iha setór saúde nian hodi kontribui ba meta nasionál iha nutrisaun ba tinan lima oin mai.
"Esforsu estratéjia ida ne'e hanesan kompilasaun de ideia, opiniaun no input husi parte relevante sira hotu ne'ebé serbisu iha área nutrisaun liuhusi diskusaun ne'ebé komprensivu no integradu. Mellora iha nutrisaun sai nu'udár determinante krítiku ida hodi estabelese iha área dezenvolvimentu kapitál umanu nasaun ne'e nian”, hatenik nia.
Diretór Servisu Saúde Munisípiu Ermera, António de Deus Fátima, konsidera workshop refere importante tebes, atubele haree fali ba estratéjia nasionál ba nutrisaun nian, hodi hadi'an di'ak liután ba tinan haat tuir mai.
"Tanba saida, ita haree katak problema nutrisaun ne'e, problema kompleksu ne'ebé mak kuaze Munisípiu hothotu hasoru, liliu Munisípiu Ermera ne'ebé mak ita boot sira hatene muito bem katak, Ermera ne'e tama hela iha risku má nutrisaun”, informa nia.
Kazu má nutrisaun iha Ermera aas, la'ós tanba hahán laiha, maibé tanba de’it meius atu prepara hahán sira mak seidauk seguru.
"Ita atu hatete loos, la'ós tanba hahán laiha. Akontese má nutrisaun la'ós tanba hahán laiha, maibé tanba de'it ita-nia medida atu prepara hahán ne'e mak seidauk di'ak. Liliu ba inan sira ne'ebé mak atu prepara hahán ba nia ona sira ne'e, seidauk tuir estandar ne'ebé mak WHO fó. Ida ne'e mak sai problema boot”, afirma nia.
Enkuantu, tuir dadus husi Ministériu Saúde (MS), Organizasaun Mundiál Saúde (OMS) númeru risku má nutrisaun ba ras badak ho krekas iha Munisipiu Ermera rasik, atinje 40,0 pursentu (40,0%). (*)
