Objetivu husi lansamentu ida ne’e, nu’udar programa kontinuasaun husi kampaña vasinasaun nian ne’ebé hala’o ona, tersa-feira foin lalais iha Postu Admnistrativu Manatuto Vila hodi enkoraja partisipasaun komunidade sira nian to’o iha nível postu no aldeia sira atu simu vasina ho másima hodi bele proteze-an husi Covid-19, nune’e bele redús risku propagasaun virus refere", dehan Ministru Francisco Martins iha Sentru saúde Salau, Postu Administrativu Soibada, Munisípiu Manatuto, kinta (26/08).
Iha lansamentu ne'e, hatutan programa Governu ba kampaña vasinasaun sai prioridade ida atubele hakbesik-an ba komunidade sira hodi esplika ho loloos objetivu husi vasina ne’e rasik, liliu halo mitigasaun hodi rezolve problema atu labele afeta ba komunidade sira.
Tanba ne’e, entidade hotu halo esforsu maka’as, husi parte seguransa nian, autoridade munisípiu to’o nível suku atubele enkoraja komúnidade hotu bele hakbesik-an ba sentru vasinasaun Covid-19.
Administradór Postu Admnistrativu Soibada, Faustino M. Lopes da Cruz, agradese ba prezensa MAPKomS nia tanba bele to'o iha fatin hodi sensibiliza informasaun kona-ba Vasinasaun Covid-19.
“Soibada konsidera hanesan fatin risku, agradese ba parte saúde ho sira-nia esforsu hamutuk ho autoridade lokál no komunitária no parte seguransa hodi luta hamutuk, presiza prevensaun atravéz vasina, tanba ne’e, agradese prezensa husi Ministru rasik bele mai to’o ami-nia fatin hodi motiva liután komunidade sira, tanba antes ne’e ami halo ona sosializasaun husi bairu, liuhusi igreja, maibé ladún másimu”, dehan nia.
Jeralmente dadus evolusaun covid-19, durante ne’e komunidade Soibada iha kazu 22, maioria tama kuarantena no rekupera hodi fila hikas ba hela fatin, totál teste swap ba komunidade hamutuk 437 no 27 mak hetan pozitivu, nune'e mós ema na'in-357 simu ona doze dahuluk no 194 simu doze daruak, kuaze metade husi populasaun Soibadu simu ona vasina.
Atividade lansamentu ne’e, hetan partisipa husi, Diretór DNDI, Diretór Saúde Munisípiu Manatuto, Komandante PNTL Munisípiu Manatuto, Administradór Postu Administrativu Soibada, Konsellu Parókiál, Reprezentante Veteranu, autoridade komunitária inklui komunidade rasik. (*)