Iha kampaña vasinasaun ne'e, Ministru Francisco, enkoraja komunidade sira atu fó kontribuisaun iha programa vasinasaun hakbesik-an ba sentru saúde.

Nune’e bele hetan imunizasaun atu iha imunidade forte hodi satan moras kontajioza ne'e.

"Para iha imunidade atubele hala’o fali atividade sira ho normál no livre hanesan iha área negósiu, eskola, kultura no seluk tan”, dehan Ministru Francisco, iha Suku Liurai, kinta (20/10)

Ho evolusaun dadus programa vasina ne’ebé hatudu katak, munisípiu Aileu atinje ona 60%.

"Tanba ne'e hanesan governante iha obrigasaun morál atu mai ko’alia no rona ita-boot sira, tanba vasina ne’e programa nasionál Governu nian ne’ebé importante tebes hodi fó protesaun ba povu nia saúde”, dehan nia.

SEAK, Teófilo Caldas, mós haforsa Governu no Estadu ida ne’e nunka hanoin atu oho nia povu maibé  Governu no Estadu ne’e hakarak proteje nia povu husi moras ne’e.

"Tamba ne’e husu ita atu kontribui no kolabora simu vasinasaun, tanba úniku dalan para prevene aan husi moras covid-19 mak tenke simu vasina”, afirma nia. (*)